Miklir bardagar eru í Donetsk héraði sem Rússar leggja höfuð áherslu á að ná að fullu á sitt vald eftir að þeir lögðu Luhansk hérað undir sig fyrir rúmri viku. Rússar halda einnig uppi óreglubundnum stórskotaliðs- og eldflaugaárásum á borgir víðs vegar um Úkraínu.
Um klukkan eitt í nótt skutu þeir tveimur eldflaugum á heilsugæslu og íbúðarhús í borginni Mykolaiv í suður Úkraínu. Tólf manns særðust. Þá er tala látinna eftir eldflaugaárás á íbúðahverfi í bænum Chasiv Yar suður af stjórnsýsluborginni Kramatorsk í Donetsk héraði komin upp í 30 manns. Níu manns var bjargað úr húsarústum í gær en fjöldi manns er enn grafinn í rústunum.
Rússar segja að bækistöðvar svæðisherdeildar Úkraínumanna hafi verið skotmarkið og að 300 úkraínskir hermenn hafi fallið í árásinni. Chasiv Yar hefur einnig sálræna þýðingu vegna þess að þetta er heimabær Volodymyrs Zelenskyy forseta landsins.
Að minnsta kosti sex óbreyttir borgarar féllu í eldflaugaárás Rússa á Kharkiv, næst fjölmennustu borg Úkraínu, í gær og rúmlega þrjátíu manns særðust. Þeirra á meðal börn á aldrinum fjögurra til sextán ára.
Í síðustu viku skoraði héraðsstjóri Donetsk héraðs á íbúa í Kramatorsk að flýja borgina til vesturs vegna sóknar Rússa og til að auðveldara verði fyrir Úkraínuher að verja borgina. Margir hafa orðið fyrir því en fjöldi eldri borgarar ætlar hins vegar ekki að flýja af mörgum ástæðum.
Íbúarnir eru margir af rússneskum uppruna og segjast óttast að vera ekki velkomnir í vesturhlutanum eftir margra ára stríðsátök í austurhéruðunum sem hófust árið 2014. Sumir segjast ekki hafa efni á því að flýja og aðrir segjast ekki hafa að neinu að hverfa í vestri.
Jake Sullivan þjóðaröryggisráðgjafi Joe Bidens forseta Bandaríkjanna segir Bandaríkjastjórn hafa fulla trú á að Úkraínumenn geti varið höfuðborgina og fleiri mikilvægar borgir. Rússar hafi misst mikið magn hergagna í stríðinu og ekki náð markmiði sínu um allsherjar sigur. Nú leiti þeir eftir hergögnum frá ríkjum eins og Íran.
„Samkvæmt okkar upplýsingum eru stjórnvöld í Íran að undirbúa að útvega Rússum nokkur hundruð eftirlits- og árásar dróna. Þá benda okkar upplýsingar einnig til þess að Íranir ætli að hefja þjálfun Rússa á notkun þeirra nú þegar í þessum mánuði,“ sagði Sullivan.
