Kostnaður við eina jarðarför getur slegið í fjórar milljónir króna

„Einn sendi mér einkaskilaboð og sagði mér að jarðarför í fjölskyldu hans hafi kostað rúmlega fjórar milljónir,“ segir Kristján forviða í samtali við blaðamann Vísis.

Á Facebook-síðu Kristjáns má finna fjörlega umræðu um þetta efni og víst er að margir eru skáldinu sammála. En þeir eru líka til sem telja þetta heldur hryssingslega umræðu. Kristján segir að upphaf þessarar hennar megi rekja til ljóðs sem hann skrifaði á sérstaka ljóðasíðu sem hann heldur úti á Facebook og heitir Ljóðin um veginn.

„Og segið svo að ljóðið sé dautt,“ segir Kristján en ljóðið birti hann í sumar, 25. júlí nánar tiltekið og heitir það Fyrirmæli.

Ljóðasíðan er býsna virk en Kristján fylgir ljóði sínu úr hlaði með fáeinum orðum og skefur ekki af því. Að kveikjan sé „yndislega klikkuð tölfræði“ sem Kristján vill ekki taka þátt í. Nefnilega sú að á ári hverju deyi rúmlega 2000 Íslendingar. Ódýrustu útfarir kosti um 700.000 krónur en yfirleitt kosti útför meira en milljón. 

„Þetta er ljótt ljóð, Kristján“

„Útfarir á Íslandi kosta þannig allavega tvo milljarða á ári hverju. Þegar ég drepst vil ég enga útför. Ég tel útfarir hjákátlegt tildur. 

Í mínum huga er vígð mold einstaklega bjánaleg og kvikindisleg leið til að selja fólki aðgang að himnaríki,“

 segir Kristján skelmislega og ekki stendur á viðbrögðum.

Séra Örn Bárður Jónsson skrifar í athugasemd um ljóðið:

„Þetta er ljótt ljóð, Kristján, fullt af fordómum. Auðvitað virði ég þínar óskir en segðu þínum nánustu þær, án þess að niðurlægja meirihluta landsmanna, sem velja það sem þú kennir við fjandann.“

Kristján svarar guðsmanninum fullum hálsi, segist engan niðurlægðan þó hann viðri sínar skoðanir. Og hann bætir í ef eitthvað er þó fyrir liggi að Séra Erni Bárði sárni fyrir hönd sinnar kirkju: 

„Ég lít á útför sem hjákátlegt og reyndar fíflalegt tildur. Athafnir sem blekkja fólk vísvitandi eru auðvitað fjandsamlegar og hreinlega skaðlegar fyrir alla menn. Loforðahröngl kristninnar er innantóm blekking. Ef það eru fordómar að vera mótfallinn hégómlegri heimsku, þá felast einnig fórdómar í því að heimta að fólk haldi í þá heimsku að greiða eina milljón fyrir að drepast,“ segir Kristján og gefur ekki tommu eftir.

Fólk þori ekki að deyja

Kristján Hreinsson talar nú fyrir því að samtök verði stofnuð til að berjast gegn þessu sem hann telur hina mestu ósvinnu. 

Kristján, sem er sjálfur 65 ára, neitar því að það sé komið haust í ljóð sín; hann býr á Ítalíu og segist horfa brosandi fram veginn. En hann vonast til þess að fólk taki sig saman og leiti leiða til að berja þennan kostnað niður. Skáldið segist hafa hugleitt þetta lengi, hann hefur talað við útfararstofur og kynnt sér málið í þaula. Þá hefur hann sett sig í samband við Landsamband eldri borgara (LEB), hvort þetta sé ekki verðugt viðfangsefni þar á bæ?

Helgi Pétursson er formaður Landsambandsins og hann segir vert að skoða málið.

„Þetta er ekki það vitlausasta sem Kristján hefur látið sér detta í hug,“ segir Helgi í samtali við Vísi. 

„Fólk er skelfingu lostið og þorir ekki að deyja. Þetta eru slíkir reikningar.“

Helgi segir Kristján hafa talað við fjórar útfararstofur og samkvæmt skáldinu þá er algengur prís á eina útför tvær milljónir.

„Það er búið að okra á okkur samfellt alla ævina og það heldur áfram yfir gröf og dauða.“ 

Helgi segir nú breytta tíma, hans kynslóð sé opnari en áður hafi verið með eldri borgara að ræða opinskátt og fordómalaust ýmsa möguleika eins og hjálp við að deyja og ýmislegt annað. Menn geti alveg skoðað þessa hlið mála einnig. 

„Hugsum málið,“ segir Helgi.