Steinninn í liði með Bandaríkjunum

Þetta er í fyrsta sinn í þrjú ár sem Forsetabikarinn er haldinn en Bandaríkin hafa fagnað sigri síðustu átta skipti sem keppnin er haldin og virðast afar líkleg til að vinna níunda skiptið í röð.

Í gær var keppt í fjórmenningi þar sem aðeins ævintýraleg endurkoma Si Woo Kim og Cam Davis tryggði alþjóðlega liðinu sinn eina sigur. Þeir höfðu lent þremur vinningum undir og voru enn tveimur vinningum undir þegar komið var að 15. teig en unnu svo fjórar síðustu holurnar.

Höfðu dálitla heppni með sér

Mesta spennan var þó í leiknum sem Tony Finau og Max Homa léku við Taylor Pendrith og Mito Pereira, þar sem steinn í litlum læk hafði mikið að segja.

Homa sló nefnilega högg á 15. braut, þegar staðan var jöfn, þar sem boltinn virtist vera á leið ofan í lækinn en lenti á steini og skoppaði skemmtilega upp og á góðan stað. Þannig náðu Homa og Finay skrautlegu pari og héldu stöðunni jafnri.

Homa og Finay tryggðu sér svo 1/0 sigur á 18. holu eftir að Pereira átti slæmt teighögg.

Aðrir sigrar Bandaríkjanna voru öruggari, sérstaklega hjá Patrick Cantlay og Xander Schauffele sem unnu reynslumesta par andstæðinganna, Adam Scott og Hideki Matsuyama, 6/5.

Jordan Spieth og Justin Thomas unnu svo 2/1 gegn Sungjae Im og Corey Conners, og þeir Cameron Young og Collin Morikawa unnu einnig 2/1 gegn Tom Kim og K. H. Lee.

Keppnin heldur áfram í dag með fimm leikjum í fjórbolta en úrslitin ráðast svo um helgina. Mótið er í beinni útsendingu á Stöð 2 Sport og hefst útsending í dag, á Sport 5, klukkan 15:30.