Telur sig mega sæta ofsóknum af hálfu MAST

„Þetta er einhver mesta niðurlæging sem mér hefur mætt og nánast verra tilfinningalega en þegar ég missti besta vin minn, móður mína síðastliðið vor,“ segir Árni Stefán í samtali við Vísi.

Aðdragandi máls er að MAST boðaði komu sína á heimili Árna Stefáns með skömmum fyrirvara til að gera úttekt á aðstæðum á heimili hans. Í bréfi dagsettu 13. október sem Einar Örn Thorlacius lögfræðingur skrifar undir er þetta vegna ábendinga um að Árni Stefán haldi gæludýr á heimili sínu í Hafnarfirði og það við óviðunandi ástæður.

Tilfellið er hins vegar, að sögn Árna Stefáns, það að utan sjúkraflutningamanna vegna fráfalls móður Árna og dýralæknis hans, hafi ekki nokkur maður maður komið inn á heimili hans í að minnsta kosti ár.

Högg sem undan svíður

Árni Stefán hefur vakið athygli fyrir einarðan málflutning á undanförnum árum þar sem hann hefur talað ákaft fyrir velferð dýra. Þetta er því högg sem Árni Stefán telur langt undir beltisstað. Hann segir að bréf þetta hafi borist klukkustund eftir að grein eftir hann birtist á Vísi þar sem hann gagnrýnir MAST harðlega og því sé ómögulegt annað en setja þetta tvennt í samhengi. Í grein sinni reiðir Árni Stefán hátt til höggs:

Árni Stefán segir samhengið blasa við og hefur nú ritað stjórnsýslukæru sem hann hefur sent til Svandísar Svavarsdóttur matvælaráðherra þar sem hann mótmælir erindi MAST sem órökstuddum dylgjum og tilhæfulausri aðgerð byggð á afar vafasömum forsendum; að hann sjálfur sé dýraníðingur?!

„Ég vil að Svandís sjái í gegnum þetta taki rök mín til greina og afturkalli eftirlit vegna óviðunandi aðbúnaðar í gæludýrahaldi mínu,“ segir Árni Stefán sem telur að með þessu sé illa vegið að æru sinni. Hann heldur talsvert mikið af dýrum, hann er með tvo Irish Setter hunda, nokkra ketti, litla páfagauka í heilu herbergi auk þess sem hann heldur dúfur. Sem yfirlýstur dýravinur til margra ára er rannsókn MAST á Árna Stefáni nokkuð sem undan svíður.

Alvarlegar ásakanir á báða bóga

Auk stjórnsýslukærunnar sem Árni Stefán hefur sent Svandísi hefur hann kvartað yfir þessu sem hann telur aðför að sér af hálfu opinberrar stofnunar við Ríkisendurskoðanda.

„MAST er hins vegar velkomið á grundvelli almenns dýraeftirlits að koma í heimsókn samkvæmt nánara samkomulagi eins og getur í kærunni þar sem fulltrúar mínir og ég munu leiða MAST í sannleikann um með,“ segir Árni Stefán sem ætlar sér ekki að sitja undir þessu sem hann telur grímulausa aðför stofnunarinnar á hendur sér og misbeitingu opinbers valds.

Árni Stefán segir það rétt, um sé að ræða alvarlegar ásakanir af sinni hálfu en þannig líti málið einfaldlega út, að bréf MAST sé til þess fallið að koma höggi á sig vegna gagnrýninnar. Hann segist ekki hafa fengið nein viðbrögð frá MAST vegna málsins.

„Það liggur fyrir að stjórnsýslukæran hefur réttaráhrif með þeim hætti að stjórnsýsluákvörðunin er í biðstöðu á meðan matvælaráðherra tekur afstöðu til hennar. Það er samt lágmarks kurteisi að bregðast við erindum aðila af stjórnsýslustofnun sem hefur því hlutverki að gegna að sinna réttindum og skyldum borgaranna.“