Lið ársins að mati Stúkunnar: Sex Ís­lands­meistarar, þrír frá KA, einn Víkingur og Guð­mundur Magnús­son

Markvörður: Anton Ari Einarsson [Breiðablik]

„Anton Ari hlaut gullhanskann þar sem enginn hélt marki sínu oftar hreinu og fékk færri mörk á sig en markvörður Íslandsmeistaranna.“

Hægri bakvörður: Höskuldur Gunnlaugsson [Breiðablik]

„Fyrirliði Blika var stórkostlegur fyrir sitt lið á þessari leiktíð eins og hann er búinn að vera undanfarin tímabil. Oftast stillt upp í hægri bakvarðarstöðunni en var út um víðan völl ásamt því að skora og leggja upp mörk.“

Vinstri bakvörður: Dagur Dan Þórhallsson [Breiðablik]

„Verður að sætta sig við það að við ætlum að stilla honum upp í vinstri bakvarðarstöðunni því hann getur leikið alls staðar á vellinum og gerði það óaðfinnanlega þegar hann lék í vinstri bakverði en hann lék víða mjög vel.“

Miðvörður: Damir Muminovic [Breiðablik]

Guðmundur og sérfræðingar Stúkunnar voru sammála um að Damir hefði átt sitt langbesta tímabil í sumar. „Damir var frábær í þessu móti, ég sagði það í sumar að hann væri farinn að minna mig á Davíð Þór Viðarsson. Hann væri byrjaður að röfla yfir innköstum og svona þvælum. Væri fínt að taka það úr leiknum sínum en hann var frábær,“ sagði Máni Pétursson.

Miðvörður: Ívar Örn Árnason [KA]

„Heldur betur óvænt nafn í þessu liði ef við hugsum þetta fyrir tímabilið því enginn átti von á að Ívar Örn yrði fyrsti maður í vörn KA og einn af fyrstu mönnum í úrvalslið deildarinnar.“

Miðjumaður: Júlíus Magnússon [Víkingur]

„Er ánægður með að vera í liðinu þó hann sýni það ekki þarna. Spilaði mjög vel fyrir Víkinga í sumar.“

Miðjumaður: Rodrigo Gomes Mateo [KA]

„Kemur inn á miðsvæðið með Júlíusi. Virkar stundum eins og það fari ekki of mikið fyrir honum en klárlega einn mikilvægasti leikmaður KA.“

Framliggjandi miðjumaður: Ísak Snær Þorvaldsson [Breiðablik]

„Stórkostlegur á þessari leiktíð. Kom eins og himnasending inn í lið Blika. Virtist hreinlega óstöðvandi fyrri part mótsins.“

Hægri vængmaður: Jason Daði Svanþórsson [Breiðablik]

Jason Daði skoraði 11 mörk og gaf sjö stoðsendingar í Bestu deildinni í sumar.

Vinstri vængmaður: Nökkvi Þeyr Þórisson [KA]

„Endaði sem markakóngur. Þarf ekkert að ræða þetta val.“

Sóknarmaður: Guðmundur Magnússon [Fram]

„Eitt óvæntasta útspil Bestu deildarinnar á þessari leiktíð. Jafn markahár Nökkva á leiktíðinni, spilaði fleiri leiki en þvílíkt tímabil. Er eini leikmaðurinn úr neðri hluta Bestu deildarinnar sem á sæti í úrvalsliðinu.“