Hákon Arnar mánuði frá því að ná metinu af Arnóri

Hákon Arnar, sem í gær var 19 ára, sex mánaða og 23 daga gamall er fjórði Íslendingurinn sem nær að skora í riðlakeppni Meistaradeildarinnar en hann er ekki sá yngsti þrátt fyrir ungan aldur.

Yngsti íslenski markaskorari Íslands í riðlakeppni Meistaradeildarinnar er áfram Skagamaðurinn Arnór Sigurðsson sem var nákvæmlega einum mánuði yngri en Hákon þegar hann skoraði fyrir CSKA Moskvu í riðlakeppni Meistaradeildarinnar 7. nóvember 2018.

Í gær vour liðnir 1421 dagar síðan íslenskt mark leit dagsins ljós í riðlakeppni Meistaradeildarinnar en það skoraði Arnór Sigurðsson fyrir CSKA Moskvu á móti Real Madrid á sjálfum Santiago Bernabéu.

Arnór lagði líka upp mark fyrir liðsfélaga sinn Fedor Chalov í þessum eftirminnilega leik hans í Madrid.

Eiður Smári Guðjohnsen var fyrsti Íslendingurinn til að skora í Meistaradeildinni þegar hann skoraði fyrir Chelsea á móti Lazio í október 2003. Eiður Smári er líka markahæsti Íslendingurinn í Meistaradeildinni með sjö mörk.

Alfreð Finnbogason bættist í hópinn með marki á móti Arsenal í lok september 2015 og Arnór skoraði síðan bæði mörkin sín árið 2018.