Fótbolti

Orri Steinn skoraði þegar FCK komst í átta liða úr­slit

Runólfur Trausti Þórhallsson skrifar
Orri Steinn fagnar marki sínu í kvöld. Það var hans fyrsta fyrir aðallið FCK.
Orri Steinn fagnar marki sínu í kvöld. Það var hans fyrsta fyrir aðallið FCK. FC Kaupmannahöfn

FC Kaupmannahöfn komst naumlega í átta liða úrslit dönsku bikarkeppninnar eftir sigur gegn Thisted FC í framlengdum leik í kvöld. Orri Steinn Óskarsson skoraði mark FCK í leiknum. Stefán Teitur Þórðarson kom inn af varamannabekknum hjá Silkeborg er liðið tryggði sér einnig sæti í átta liða úrslitum.

Danmerkurmeistarar FCK lentu í miklum vandræðum með C-deildarlið Thisted FC á útivelli. Orri Steinn skoraði eina mark FCK í venjulegum leiktíma en staðan að honum loknum var 1-1. Andreas Cornelius kom inn fyrir Orra Stein eftir rúmlega klukkustund og skoraði hann bæði mörk FCK í framlengingunni, lokatölur 3-1.

Ísak Bergmann Jóhannesson var í byrjunarliði FCK en var tekinn af velli í hálfleik. Hákon Arnar Haraldsson var ekki í leikmannahópnum að þessu sinni.

Stefán Teitur var óvænt á varamannabekknum hjá Silkeborg en eflaust var verið að hvíla Skagamanninn öfluga þar sem hann byrjar nær alla leiki liðsins. Hann kom inn á 69. mínútu en aðeins örfáum sekúndum áður hafði Silkeborg komist 2-1 yfir. 

Eftir það bætti liðið við einu marki og lauk leiknum með 3-1 sigri Silkeborg. Stefán Teitur og félagar því komnir í 8-liða úrslit bikarkeppninnar líkt og FCK.

Þá spilaði Aron Sigurðarson aðeins fimm mínútur þegar AC Horsens tapaði 1-0 fyrir B-deildarliði Vejle.

Fótbolti Danski boltinn

Mest lesið


Fleiri fréttir

Sjá meira


×

Mest lesið