Tiger fékk tveggja milljarða PGA bónus þrátt fyrir að spila lítið sem ekkert í ár

Eins og flestir vita þá er allt annar áhugi á golfmótum ef Tiger er með en þegar hann er ekki með. Þá erum við kannski ekki að tala um áhuga mestu golfáhugamannanna heldur þeirra sem fylgjast kannski minna með en hafa mikinn áhuga á að fylgjast með Tiger.

Woods hefur aðeins náð að spila þrjá hringi á risamótum síðustu þriggja ára en hann hefur glímt við meiðsli eftir að hafa slasast illa í bílslysi í febrúar 2021.

Woods var líka efstur þegar bónusinn var veittur í fyrsta sinn í fyrra en fékk þá átta milljónir dollara. Að þessu sinni fær hann fimmtán milljónir dollara eða 2,1 milljarð íslenskra króna.

Rory McIlroy, efsti maður á heimslistanum, varð annar á bónuslistanum. Hann fær tólf milljónir dollara.

PGA mótaröðin deilir út alls hundrað milljón dollurum í bónusa sem eru veittir þeim sem auka mestan áhuga á PGA-mótaröðinni.

Tiger hefur ekki spilað á móti síðan hann missti af niðurskurðinum á Opna breska risamótinu í júlí. Það er búist við því að hann spili á Hero World Challenge mótinu á Bahamaeyjum í næstu viku.