Gangandi vegfarandi lést eftir að ekið var á hann

Lögreglan greinir frá þessu í tilkynningu.  

Tilkynning um slysið barst um klukkan hálf eitt í nótt en bíll á leiðinni norður Höfðabakka nálægt Árbæjarsafni hafnaði á vegfarandanum. 

Um var að ræða karlmann á fimmtugsaldri. Hann var fluttur á Landspítala eftir slysið en lést síðar um nóttina. 

Að sögn lögreglu var lokað fyrir umferð um Höfðabakka á milli Bæjarháls og Stekkjarbakka á meðan unnið var á vettvangi. Lögreglan á höfuðborgarsvæðinu og rannsóknarnefnd samgönguslysa rannsaka tildrög slyssins.

Fréttin hefur verið uppfærð.