Laus gegn tug milljarða tryggingu sakaður um sögu­leg fjár­svik

Bankman-Fried er ákærður fyrir fjársvik, peningaþvætti og ólögleg kosningaframlög. Hann var framseldur frá Bahamaeyjum, þar sem FTX var með höfuðstöðvar, til Bandaríkjanna á miðvikudag. 

Eftir að hann kom fyrir dómara í New York í gær gekk hann út úr dómshúsinu með foreldrunum sínum eftir að þeir féllust á að skrifa undir 250 milljón dollara tryggingu, jafnvirði tæpra 36 milljarða íslenskra króna. Foreldrar Bankman-Fried, sem er þrítugur, samþykktu einnig að halda honum í stofufangelsi heima hjá sér í Kaliforníu á meðan hann bíður réttarhalda.

AP-fréttastofan segir að dómari hafi meðal annars fallist á að veita honum lausn gegn tryggingu vegna þess að hann samþykkti sjálfur að vera framseldur til heimalandsins. Nicolas Roos, saksóknari í málinu, sagðist telja að tryggingaféð væri það hæsta í alríkismáli til þessa. Hann sagði ennfremur að svikin sem Bankman-Fried hefði framið gegn fjárfestum og viðskiptavinum FTX væru af sögulegri stærðargráðu.

Svikin sem Bankman-Fried er ákærður fyrir tengjast gjaldþroti FTX í síðasta mánuði. Hann er meðal annars sakaður um að hafa tekið milljarða dollara af innistæðum viðskiptavina kauphallarinnar, sem var sú þriðja stærsta sinnar tegundar í heiminum, til þess að halda vogunarsjóði sínum á floti.

Tveir nánir samstarfsmenn hans hafa þegar játað sig seka um glæpi og vinna nú með saksóknurum að rannsókn málsins. Bankman-Fried á yfir höfði sér áratugalanga fangelsisvist verði hann fundinn sekur. Hann hefur sjálfur neitað því að hafa brotið nokkuð af sér.