Stjörnurnar flykktust í bíó að sjá Villi­bráð

„Myndin er mjög hressandi, mjög skelfileg og bara hræðilega óþægileg,“ sagði Elsa María í kvöldfréttum Stöðvar 2 í gær.

Myndin segir frá sjö vinum sem ákveða að fara í stórhættulegan samkvæmisleik. Þau leggja síma sína á borðið og fallast á það að deila öllum símtölum og skilaboðum með hópnum til þess að sanna að þau hafi ekkert að fela.

Um er að ræða endurgerð af ítölsku verðlaunakvikmyndinni Perfetti Sconoscuti eða Perfect Strangers, sem kom út árið 2016. Myndin hefur verið endurgerð átján sinnum og komst hún því í Heimsmetabók Guinness.

Íslenska handritið skrifaði leikskáldið Tyrfingur Tyrfingsson, ásamt Elsu Maríu.

Með stærstu hlutverk fara Aníta Briem, Björn Hlynur Haraldsson, Gísli Örn Garðarsson, Hilmar Guðjónsson, Hilmir Snær Guðnason, Nína Dögg Filippusdóttir og Þuríður Blær Jóhannsdóttir.

Það var húsfyllir í Smárabíói í gærkvöldi á forsýningu myndarinnar. Aðstandendur myndarinnar voru í góðum gír. Meðal gesta á sýningunni voru Bríet, Áslaug Arna Sigurbjörnsdóttir, Ari Eldjárn, Þorsteinn Bachmann, Hannes Þór Halldórsson, Villi Neto, Hildur Björnsdóttir, Vítalía Lazareva, Berglind Festival og Bergur Ebbi Benediktsson svo einhverjir séu nefndir.