Skólagjöldin að sliga listnema

Nemendurnir krefja stjórn skólans svara og vilja vita hvernig á því standi að skólagjöldin hækki árlega án nokkurra útskýringa: Hvað skýri þá hækkun?

„Til dæmis greiddu nemendur skólans sem eru nú á öðru ári 298 þúsund krónur á önn fyrsta árið sitt í skólanum. Nú er ljóst að næsta haust verða þau gjöld orðin 340 þúsund krónur.“

Í bréfinu, sem Vísir hefur undir höndum er rakið að í heimsfaraldri Covid19 hafi hagnaður Listaháskólans, samkvæmt ársreikningi skólans, verið 138 milljónir króna og eigið fé 91 milljón. Skólanum var þá lokað og nemendum meinaður aðgangur. En kennarar hafi af mikilli ósérhlífni hagað námskeiðahaldi sínu að teknu tilliti til aðstæðna.

Íslenskir námsmenn steypi sér í skuldir

Spurt er hvers vegna ekki hafi verið tekin sú ákvörðun þá að styðja við bak nemenda með afslætti á skólagjöldum líkt og margir erlendir listaháskólar gerðu?

„Hluti af skólagjöldum okkar fer að öllum líkindum í einhverja þá hluti sem lögðust af á þessum tíma, er hluti af þessum 138 m.kr. þá ekki peningur nemenda? Það væri því ágætt að fá nákvæmar upplýsingar um það hvert þessi hækkandi upphæð, sem við greiðum skólanum tvisvar á ári er að fara? Fá fyrirtæki myndu boða til sambærilegra verðhækkana án útskýringa eða sérstakrar tilkynningar þess efnis,“ segir í bréfinu.

Þá er því velt upp hvort skólagjöld Listaháskólans séu að upplagi of há en samkvæmt upplýsingum sem finna má á síðu Stúdentaráðs Háskóla Íslands eru skólagjöld á Íslandi ekki á pari við það sem þekkist meðal nágranna okkar á Norðurlöndunum né tekjur nemenda.

„Sú er staðreyndin að hluti nemenda skuldsetur sig á meðan á námi stendur og því er fjárhagslegt öryggi þeirra til frambúðar ekki tryggt hérlendis.“

Íslenskir stúdentar fá miklu minni stuðning en nágrannar okkar

Þá er bent á í bréfinu að 71 prósent íslenskra stúdenta vinni samhliða námi. Af þeim eru 72 prósent íslenskra stúdenta sem vinna því annars hefðu þeir ekki efni á því að stunda nám. Í samanburði við Norðurlöndin skora íslenskir stúdentar þar hæst. Fullyrt er að rúm 30 prósent stúdenta eigi við fjárhagslega örðugleika að stríða og fjórðungur þeirra telur að vinna samhliða námi hafi neikvæð áhrif á námsárangurinn.

„Samkvæmt árstölum eru heildartekjur háskóla á ársnema á Norðurlöndunum að meðaltali 4,6 milljónir króna árlega en á Íslandi aðeins 2,9 milljónir. Nemendur á Íslandi fá því um 1,7 milljónum krónum minna. Raunin er því sú að fjárhagslegur stuðningur við fólk í námi er af skornum skammti miðað við önnur Norðurlönd.“

Undir bréfið skrifar Valgerður Birna Jónsdóttir fyrir hönd nemenda en jafnframt fylgir skjal með nöfnum þeirra.