Aké skaut Man City á­fram í bikarnum

Nathan Aké skoraði eina markið þegar Manchester City vann Arsenal 1-0 í fyrsta leik 4. umferðar ensku bikarkeppninnar.

Aðeins einn leikur fór fram í kvöld og það var sannkallaður stórleikur. Topplið ensku úrvalsdeildarinnar heimsótti ríkjandi Englandsmeistara Manchester City. Bæði lið voru nokkuð breytt og lykilmenn hvíldir. Það sást en að sama skapi sást að bæði lið ætluðu sér ekki að gera nein mistök og bæði lið spiluðu skipulagaðan varnarleik.

Ekkert var skorað í fyrri hálfleik og var staðan markalaus þangað til á 64. mínútu leiksins. Heimsmeistarinn Julián Álvarez átti þá þrumuskot sem endaði í stönginni. Þaðan féll boltinn fyrir fætur Jack Grealish, vængmaðurinn sneri upp og niður með boltann áður en hann renndi boltanum út á varnarmanninn Aké sem skoraði með sínum verri hægri fæti.

Það var eins og Aké hefði aldrei gert neitt annað en hann renndi boltanum hinn rólegasti í hornið fjær.

Skytturnar gerðu breytingar og ógnuðu marki Man City töluvert undir lokin en tókst aldrei að galopna vörn heimaliðsins. Þegar flautað var til leiksloka var staðan enn 1-0 og Man City komið áfram í 5. umferð ensku bikarkeppninnar.