Ítölsku meistararnir fara með forystu til Lundúna

Ítalíumeistarar AC Milan unnu góðan 1-0 sigur er liðið tók á móti Tottenham í fyrri viðureign liðanna í 16-liða úrslitum Meistaradeildar Evrópu í kvöld.

Það var Brahim Diaz sem kom heimamönnum í forystu strax á sjöundu mínútu leiksins. Markið var þó ekki auðsótt því Fraser Forster hafði verið vel í tvígang í marki Tottenham áður en Diaz kom boltanum loksins í netið í þriðju tilraun.

Gestirnir í Tottenham náðu að skapa sér nokkur hálffæri áður en fyrri hálfleik lauk, en inn vildi boltinn ekki og staðan því 1-0 þegar liðin gengu til búningsherbergja.

Lundúnaliðið færði sig framar á völlinn í síðari hálfleik og reyndi hvað það gat til að jafna metin. Það voru þó heimamenn í AC Milan sem fengu hættulegri færi í seinni hálfleiknum, en líkt og fyrir hlá tókst ekki að koma boltanum í netið og lokatölur urðu því 1-0,  AC Milan í vil.

Ítölsku meistararnir fara því með forystu í seinni leik liðanna sem fer fram á heimavelli Tottenham þann 8. mars næstkomandi.