Munu hafa apó­tekið opið allan sólar­hringinn

Í tilkynningu frá Lyfjavali segir að bílalúgurnar hafi til þessa verið opnar frá 10 á morgnana til klukkan 23 á kvöldin en frá deginum í dag verða þær alltaf opnar.

Lyfjaval opnaði fyrsta apótek sitt, Apótek Suðurnesja, árið 1996, og fyrsta bílaapótekið 2005. Þó hóf fyrirtækið netsölu með lyf árið 2022.

Haft er eftir Svani Valgeirssyni framkvæmdastjóra að fyrirtækið hafi fengið mjög margar áskoranir um aukinn opnunartíma. „Við teljum mikilvægt að verða við þeim. Það er það stór hópur á ferðinni á nóttunni, ferðmenn, fólk í vaktavinnu og fólk sem þarf á lyfjum og annarri þjónustu að halda, hvað svo sem klukkan er,” segir Svanur.

Hann segir bílalúgurnar gera fólki auðveldara um vik að nálgast lyf og aðrar nauðsynjar en ef fólk þyrfti að fara inn í apótekið sjálft og því sé hann ekki í vafa um að stór hópur muni vilja nýta sér þessa stórauknu þjónustu.

Lyfjaval rekur nú sjö apótek, sex á höfuðborgarsvæðinu og nýopnað apótek á Aðaltorgi í Reykjanesbæ. Fjögur apótekanna eru bílaapótek, í Hæðasmára, á Vesturlandsvegi, í Suðurfelli og á Reykjanesi.