Fannst á lífi þrjá­tíu árum síðar í öðru landi

Patricia Kopta bjó í Pittsburgh í Pennsylvaníu-ríki og hafði starfað við ýmislegt, meðal annars sem lyftuvörður. Hún var kaþólikki og reyndi hvað hún gat að fara í messu alla sunnudaga. 

Þegar hún nálgaðist miðjan aldur fór hún þó að sýna af sér skrítna hegðun, fór oft að röfla um að móðir Guðs hafi rætt við hana og varað hana við kjarnorkuheimsendi. Henni var stuttu síðar sagt upp í vinnunni sinni og fór þá að stunda það að ráfa um miðbæ Pittsburgh.

Þrjátíu ár og eitt bréf

Það var síðan árið 1992 þegar hún hvarf. Bob Kopta, eiginmaður hennar, kom heim og fann hana hvergi. Hann tilkynnti lögreglu að hún væri týnd en hann átti ekki eftir að heyra frá henni í mörg ár. 

Árin voru þrjátíu þar sem hann heyrði ekkert frá henni, fyrir utan eitt bréf sem hún sendi Bob þar sem hún sagði honum að einhver væri að elta hana. Lögreglumenn gerðu allt sem þeir gátu til að finna hana en höfðu ekki erindi sem erfiði. Þeir meira að segja ræddu við sjáanda sem tilkynnti þeim að Patricia væri látin og lík  hennar væri nærri vatni. Að lokum var hún skráð látin af yfirvöldum í Bandaríkjunum. 

Nýlega komust lögreglumenn að því að árið 1999 var Patricia lögð inn á heimili fyrir eldri borgara á eyjunni Púertó Ríkó í Karíbahafi. Hún sagði forsvarsmönnum heimilisins lítið um sig en starfsmenn töldu hana hafa komið á eyjuna með skemmtiferðaskipi frá Evrópu.

Interpol aðstoðaði

Í gegnum árin sagði hún þó starfsmönnum meira og meira um sig þar til að félagsráðgjafi fékk aðstoð frá útsendara Interpol til að komast að því hver konan væri. Tekið var DNA-próf sem sannaði að hún var í raun og vera Patricia Kopta. 

Bob gifti sig aldrei aftur en hann og systir Patriciu, Gloria Smith, vonast til þess að hægt sé að koma henni aftur til Pennsylvaníu. 

„Við erum þakklát fyrir það að Patty sé á lífi. Við héldum að hún væri látin öll þessi ár. Það kemur mjög á óvart að hún sé enn á lífi. Ég vona að ég geti farið þangað og hitt hana,“ hefur The Guardian eftir Smith.