Kanna sak­hæfi Ís­lendings í hrotta­legu morð­máli

Frá þessu er greint á fréttamiðlinum KGET í Kaliforníu. Þar kemur fram að Daníel verði leiddur fyrir dóm þann 25. apríl næstkomandi þar sem ný gögn frá sálfræðingi verða metin. Hann hafði árið 2021 verið metinn ósakhæfur. Í framhaldinu gekkst Daníel undir sálfræðimeðferð og var þar metinn sakhæfur í mars á síðasta ári.

Daníel er grunaður um að hafa myrt og limlest unga konu í bænum Ridgecrest í Kaliforníu í maímánuði 2021. Hann hefur verið ákærður fyrir morð af fyrstu gráðu en neitar sök.

Að morgni dags 18. maí fannst Daníel Gunnarsson í bílskúr á heimili stjúpföður síns í Ridgecrest með lík Katie Pham, 21 árs stúlku, við hlið sér. Samkvæmt dómsgögnum sem fréttastofa 17 News hefur undir höndum voru buxur, hendur og háls Daníels útataðar í blóði.

Að mati réttarmeinafræðings var Pham stungin til bana en hún var með fjölda stunguáverka á líkama og höfði. Talið er að Daníel hafi notað ísnál við verknaðinn.

Daníel neitaði sök þegar mál hans var þingfest í Kern-sýslu í Kaliforníu í gær.