Gítar­leikari Mötl­ey Crüe lög­sækir fé­laga sína

Mars hefur verið gítarleikari Mötley Crüe frá upphafi en sveitin var stofnuð í Los Angeles árið 1981. Aðrir meðlimir eru söngvarinn Vince Neil, trymbillinn Tommy Lee og bassaleikarinn Nikki Sixx sem Mars beinir spjótum sínum einkum að.

Gítarleikarinn er nokkuð eldri en hinir hljómsveitarmeðlimirnir og er hrjáður af hrörnunarsjúkdómi er kallast AS (Ankylosing Spondylitis). Í fyrra var það tilkynnt að Mars gæti ekki lengur túrað með hljómsveitinni.

Eigi ekki heimtingu á peningum ef hann túrar ekki

Mötley Crüe er þekkt sem ein mesta svallsveit allra tíma. Hefur þessi saga verið sögð í bókinni The Dirt og samnefndri bíómynd sem kom út hjá Netflix árið 2019. Kom þar meðal annars fram að Sixx hafi verið við dauðans dyr vegna heróínnotkunar og að Neil hafi keyrt undir áhrifum og valdið dauða annars manns.

Mars telur að verið sé að reyna að þvinga hann út úr hljómsveitinni, sem hann á 25 prósenta hlut í. Hann muni ekki fá nema 5 prósenta hlut í hagnaði komandi túrs og sölu varnings.

„Ef þú getur ekki spilað á tónleikum ertu að hætta í hljómsveitinni,“ sagði Sahsa Frid, lögmaður sveitarinnar, eftir að Mars hafði lagt fram málsóknargögnin. „Aðalhlutverk hljómsveitar er að koma fram á tónleikum. Ef hluthafi hættir getur hann ekki fengið neinar bætur frá túrnum, sem er það sem Mick er að reyna að gera. Það er klárt mál að Mick á ekki heimtingu á meiri pening.“

Nikki Sixx hefur einnig brugðist við á samfélagsmiðlum og sakaði lögmenn Mars um að standa bak við málsóknina. „Þetta er sorgardagur fyrir okkur og við eigum þetta ekki skilið fyrir öll þessi ár sem við höfum haldið honum uppi. Við óskum honum samt alls hins besta og vonum að hann finni lögmenn og umboðsmenn sem skaða hann ekki. Við elskum þig Mick!“