Berglind Festival, Logi Geirs og Steindi skemmtu sér á forsýningu Aftureldingar

Elma Rut Valtýsdóttir skrifar 11. apríl 2023 18:01

Það var húsfyllir á forsýningu nýju íslensku þáttaraðarinnar Aftureldingar. Samsett/Mummi Lú

Það var stemning í loftinu í Bíó Paradís nú á dögunum þegar þar fór fram forsýning á íslensku þáttaröðinni Aftureldingu. Stórskotalið íslenskra leikara kemur saman í þáttaröðinni undir leikstjórn Hafsteins Gunnars Sigurðssonar, Göggu Jónsdóttur og Elsu Maríu Jakobsdóttur.

Ingvar E. Sigurðsson fer með hlutverk útbrunninnar handboltastjörnu frá níunda áratugnum sem tekur við þjálfun kvennaliðs Aftureldingar eftir margra ára óreglu. Á gömlum heimaslóðunum þarf hann að horfast í augu við breytta tíma, fjarlæga dóttur sína, veðmálabrask og síðast en ekki síst, nýja kynslóð kvenna sem kallar ekki allt ömmu sína.

Aðrir leikarar í þáttunum eru meðal annars Þorsteinn Bachmann, Saga Garðarsdóttir, Sveppi, Svandís Dóra Einarsdóttir, Vala Kristín Eiríksdóttir og Steinunn Ólína Þorsteinsdóttir.

Handrit skrifa Hafsteinn Gunnar Sigurðsson, Halldór Laxness Halldórsson (Dóri DNA), Jóhanna Friðrika Sæmundsdóttir, Jörundur Ragnarsson og Katrín Björgvinsdóttir.

Þáttaröðin er framleidd af Zik Zak kvikmyndum sem síðast sendu frá sér hina vinsælu kvikmynd Villibráð.

Fyrsti þáttur var sýndur á RÚV á sunnudaginn en aðstandendur þáttanna tóku forskot á gleðina í Bíó Paradís ásamt góðum gestum. Á meðal gesta á forsýningunni voru Þorsteinn Bachmann, Svandís Dóra, Villi Neto, Berglind Festival, Jóhann Sigurðsson, Steindi, Ágúst Bent og Logi Geirsson.