Neytendastofa slær á fingur Origo

Ábending um markaðssetningu Origo á Bose QuietComfort II heyrnartólum barst Neytendastofu þann 20. október í fyrra. Þar var stofnuninni bent á að Origo hafi birt fullyrðingar um að heyrnartólin væru með „besta noise cancellation í heimi.“

Í kjölfarið sendi Neytendastofa Origo bréf þar sem meðal annars var vísað til laga sem fjalla um skyldu fyrirtækja til að geta sannað fullyrðingar sem fram koma í auglýsingum þeirra. Geti fyrirtæki ekki sannað fullyrðingarnar geti þær verið til þess fallnar að brjóta gegn ákvæðum í lögunum. Þá óskaði stofnunin eftir skýringum eða athugasemdum frá Origo vegna þessa.

Niðurstaða rannsóknar hafi verið afgerandi

Nokkrum dögum síðar barst Neytendastofu svar frá Origo. Þar kom fram að félagið telji sig ekki hafa brotið gegn lögum með fullyrðingunni. Bent var á að fyrir aftan umrædda fullyrðingu hafi verið að finna stjörnu sem vísi í texta sem jafnframt komi fram í auglýsingunni. Þar hafi komið fram að fullyrðingin væri samkvæmt rannsókn löggilts úttektaraðila.

Í bréfinu frá Origo var einnig að finna samantekt úr niðurstöðu rannsóknarinnar sem um ræðir. Origo vísaði til þess að niðurstaða rannsóknarinnar hafi verið afgerandi, umrædd heyrnartól frá Bose hafi verið með bestu hljóðdeyfinguna (e. noise cancellation) af þeim heyrnartólum sem voru prófuð.

rrrrrrÞessi rannsókn hafi verið gerð á meðal heyrnartóla frá fremstu framleiðendum slíkra heyrnartóla. Rannsóknin hafi ekki byggt á matskenndum skoðunum einstaklinga, hún hafi farið fram á rannsóknarstofu þar sem hljóðdeyfingin var prófuð með viðurkenndum aðferðum.

Rannsóknin hafi verið gerð á meðal heyrnartóla frá fremstu framleiðendum slíkra heyrnartóla á markaðnum. Hún byggi ekki á matskenndum skoðunum einstaklinga heldur sé um að ræða nákvæma rannsókn sem hafi farið fram á rannsóknarstofu þar sem hljóðdeyfingin hafi verið prófuð með viðurkenndum aðferðum.

Þá benti Origo á að Bose, fyrirtækið sem framleiðir umrædd heyrnartól, hafi notað umrædda fullyrðingu í sínu markaðsefni. 

Banna Origo að nota fullyrðinguna

Neytendastofa komst þó að þeirri niðurstöðu að það væri ekki í lagi fyrir Origo að nota þessa fullyrðingu í markaðsefni sínu. Stofnunin ákvarðaði að Origo hafi brotið gegn lögum um eftirlit með viðskiptaháttum og markaðssetningu.

„Með vísan til 2. mgr. 21. gr. c. laga nr. 57/2005, um eftirlit með viðskiptaháttum og markaðssetningu, bannar Neytendastofa Origo hf. að viðhafa framangreinda viðskiptahætti. Bannið tekur gildi frá dagsetningu ákvörðunar þessarar,“ segir í lok ákvörðunar stofnunarinnar.