Dramatísk kveðju­stund þegar James Cor­d­en söng í sínu síðasta bílakarókí

Í þætti gærdagsins mátti sjá söngkonuna Adele koma Corden á óvart á heimili hans í Los Angeles en Adele og Corden eru góðir vinir. Corden svaf værum svefni á heimili sínu þegar Adele læddist inn og vakti hann með miklum látum.

„Komdu nú, þetta er síðasta vikan þín. Ég ætla að skutla þér í vinnuna og við tökum síðasta bílakarókíið,“ sagði Adele við vin sinn.

Bílakarókí eða Carpool Karaoke er einn vinsælasti liðurinn í þætti Corden. Liðurinn felst í því að hann fær til sín heimsfrægar tónlistarstjörnur, fer með þær á rúntinn og fær þær til þess að syngja hástöfum með sér. Í gegnum tíðina hefur Corden fengið til sín stjörnur á borð við Justin Bieber, Jennifer Lopez, Ed Sheeran, Adele, Bruno Mars og Selenu Gomez.

Mariah Carey neitaði að syngja

„Það sem ég hafði mestar áhyggjur af var hvernig ég myndi fá gesti í þáttinn. Okkur tókst ekki að bóka neinn og bílakarókíið, það vildi enginn taka þátt í því. Allir á jörðinni sögðu nei. Svo allt í einu sagði Mariah Carey já og við vorum titrandi,“ rifjaði Corden upp í þættinum.

Málið vandaðist hins vegar þegar Mariah Carey sagðist aðeins vera til í að spjalla en neitaði að syngja. Corden náði þó að sannfæra söngkonuna með því að kveikja á tónlistinni og úr varð þessi vinsæli liður.

„En Stevie Wonder breytti þessu gjörsamlega. Eftir að hann kom þá voru aðrir tónlistarmenn til í að koma,“ sagði hann.

Lag Adele samið út frá persónulegri reynslu Corden

Í innslaginu taka Adele og Corden að sjálfsögðu nokkur vel valin lög, þar á meðal lagið I Drink Wine.

„Þetta lag er afar sérstakt fyrir okkur bæði, ég veit ekki hversu mikið þú vilt tala um það,“ sagði Adele sem samdi lagið út frá einlægu samtali sem hún átti við Corden þegar þau voru stödd í flugvél á leiðinni heim úr fjölskyldufríi.

„Ég spurði þig hvað væri að, því þú varst eitthvað niðurlútur og þú opnaðir þig alveg við mig. Við áttum svona sex klukkutíma samtal um þetta,“ en vinirnir ræddu meðal annars um vinnuna og þau áhrif sem internetið getur haft á fólk í skemmtanabransanum.

„Ég hugsa til þín í hvert skipti sem ég syng þetta lag,“ sagði söngkonan.

„Man ekki hvernig lífið var áður“

„Ég trúi ekki að þetta sé að gerast. Eina stundina held ég að ég hafi það fínt en svo hugsa ég með mér að þetta er síðasta bílakarókí sem mun nokkurn tímann gera,“ sagði Corden. „Ég er bæði spenntur og hræddur. Síðustu átta ár hafa verið klikkuð. Annars vegar líður mér eins og þetta hafi liðið svo hratt en hins vegar man ég ekki hvernig lífið var áður.“

Fyrir ári síðan tilkynnti Corden að hann ætlaði að kveðja þáttinn. Hann sagði það hafa verið erfiða ákvörðun en hann hefði aftur á móti aldrei séð fyrir sér að þátturinn yrði hans lokaáfangastaður.

Á síðustu átta árum hefur Corden verið tilnefndur til Golden Globes verðlauna fyrir hlutverk sitt í The Prom. Hann hefur verið tilnefndur 26 sinnum til Emmy verðlauna og unnið styttuna ellefu sinnum. Tilnefningarnar hefur hann fengið fyrir The Late Late Show en einnig fyrir Carpool karaoke, þáttastjórn og framleiðslu á Friends endurfundunum og svo fyrir verðlaunahátíðir sem hann hefur verið kynnir og framleiðandi á.

Kominn tími til þess að snúa aftur til Bretlands

Nú finnst honum þó kominn tími til þess að yfirgefa skemmtanabransann í Los Angeles og snúa aftur til heimalands síns, Bretlands.

„Ég á eftir að sakna þess alls. Ég hef eignast svo marga vini, þannig ég mun fyrst og fremst bara sakna þess að mæta í vinnuna og hitta alla vini mína. Ég á líka eftir að sakna Los Angeles. Ég elska að vera hér og þetta er búið að vera þvílíkt ævintýri. En ég finn það bara svo sterkt að það er kominn tími til þess að við fjölskyldan förum heim, til fólks sem er að eldast og fólks sem við söknum.“

„Ég á eftir að sakna þín svo mikið,“ sagði Adele með tárin í augunum og taka eflaust margir áhorfendur þáttarins undir þau orð.

Hér fyrir neðan má sjá innslagið í heild sinni.