Getur ekki sótt þá slitnu skóla­starf­semi sem er í boði vegna verk­falla

Verkfallsaðgerðir BSRB í níu sveitarfélögum hófust í morgun. Aðgerðir beinast fyrst og fremst að leik- og grunnskólum en einnig hafa Hafnarstarfsmenn í Ölfusi lagt niður störf. Leikskólastarfsmenn í Kópavogi, Garðabæ, Mosfellsbæ, Hveragerði, Árborg og Vestmannaeyjum og grunnskólastarfsmenn í Hafnarfirði og Ölfus hafa sömuleiðis lagt niður störf.

„Þegar líða tekur á vikuna og næstu vikur ef nást ekki samningar þá munum við missa úr vinnu,“ segir Jóhanna Sigurjónsdóttir.

Hefur sérstaklega mikil áhrif á fötluð börn

Jóhanna er búsett í Ölfusi og á tvo drengi, einn í leikskóla og annan í grunnskóla. Eldri sonur hennar er fatlaður og þarf því fullan stuðning, sem fæst nú ekki vegna verkfallanna.

„Þannig að hann getur ekki sótt þessa slitnu skólastarfsemi sem er í boði fyrir þau börn sem geta sótt skólann,“ segir Jóhanna. 

Margir hafa lýst yfir áhyggjum af áhrifum verkfallanna á börn með fötlun, sem Jóhanna tekur undir. 

„Hann er mikill rútínukall og auðvitað raskar þetta hans rútínu að vera bara að mæta í skólann á sínum dögum og vera heima á móti. Og við foreldrarnir þurfum að vera heima við með hann.“

Þurfa að fara út af leikskólalóðinni til að borða hádegismat

Verkföll munu að óbreyttu halda áfram út þessa viku og ná til 10 sveitarfélaga, en alls hafa verkfallsaðgerðir verið samþykktar í 29 sveitarfélögum. Jóhanna og barnsfaðir hennar vinna bæði vaktavinnu og sjá því fram á miklar flækjur í sínum störfum haldi verkföll áfram.

„Í minni vinnu erum við mörg sem eigum börn og líka aðrir starfsmenn sem eiga börn með sérþarfir. Þau gátu ekki alveg svarað mér hvernig þetta yrði ef maður þyrfti að vera frá vinnu út af þessu. Hvort maður ætti að nýta veikindadag eða sumarfrí eða hvort maður yrði bara launalaus,“ segir Jóhanna. 

Samkvæmt skráningu á heimasíðu BSRB eru aðeins verkföll í grunnskólanum í Ölfusi, ekki leikskólanum. Verkföll grunnskólastarfsmannanna hafa hins vegar áhrif á leikskólann, þar sem sama mötuneytið sér um að fæða börnin. 

„Ég á annan yngri sem er í leikskóla. Þau þurfa að vera búin að borða þegar þau mæta og það fellur niður ávaxtastund þannig að þau fá ekki morgunhressingu. Í hádeginu á að koma og sækja þau hálf tólf og þú þarft að fara með þau út af svæðinu. Það er að segja þú mátt ekki fara út í bíl og gefa barninu að borða heldur þarftu að yfirgefa svæðið. Við vorum svolítið að hlæja að þessu nokkur af því maður fer bara yfir á næsta bílaplan, gefur að borða og kemur aftur,“ segir Jóhanna. 

Fundað hjá ríkissáttasemjara í dag

Fundir hjá ríkissáttasemjara hafa hingað til ekki skilað neinum árangri og hafa samninganefndir ekki fundað hjá honum síðan 12. maí. Samtal er þó í gangi milli samningsaðila og munu þeir funda hjá ríkissáttasemjara síðdegis í dag. 

„Maður vonar bara að það verði samið við þetta blessaða fólk. Strákurinn minn getur ekki sótt skólann nema með fullan stuðning. Þannig að ég hvet til að semja við þau sem fyrst af því þetta hefur svo keðjuverkandi áhrif á svo margar fjölskyldur,“ segir Jóhanna.