Eftir fimm ára leyndarhjúp yfir greinargerð setts ríkisendurskoðanda, Sigurðar Þórðarsonar, um Lindarhvolsmálið svokallaða birti þingflokksformaður Pírata greinargerðina í gær. Fjármálaráðherra segir ráðuneyti sitt hafa fylgt lögum með því að veita ekki aðgang aðgreinargerðinni.
„Ég hef nú ekkert lesið þessa greinargerð sérstaklega og ætla ekkert að fara tjá mig um hana út af fyrir sig. En það liggur hins vegar fyrir að þessari greinargerð var svarað með andmælum frá þeim sem athugasemdirnar beinast að. Það virðist enginn á þinginu eða í fjölmiðlum hafa áhuga á því að sjá hina hlið málsins. Enda er fólk ekki í neinni staðreyndaleit. Það er verið að leitast við að þyrla upp ryki og varpa skugga á störf þeirra sem þarna koma að málum,“ segir Bjarni Benediktsson fjármálaráðherra.
Ekki boðlegt svar
Bergþór Ólason, þingflokksformaður Miðflokksins, gefur lítið fyrir svör ráðherra. „Í ljósi sögu síðustu vikna og mánaða þá finnst mér það ekki boðlegt svar hjá fjármálaráðherra,“ segir Bergþór.
„Það að tefja birtingu þessarar greinargerðar í öll þessi ár, ég hreinlega skil ekki hvað mönnum gengur til með því,“ segir Bergþór hann bíði spenntur eftir útskýringum fulltrúa fjármálaráðuneytisins og stjórnarformanns Lindarhvols um það hvaða efni það eru sem þau telji að verði tilefni til þess að skaðabótamál stofnist á hendur ríkissjóði.
Settur ríkisendurskoðandi telur brýnt að ríkissaksóknari taki málið til rannsóknar, meðal annars vegna þess hve ólík skýrsla hans frá 2018 og skýrsla Ríkisendurskoðunar frá apríl 2020 er.
„Það er eins og það sé engin tenging á milli málanna tveggja. Það sé verið að skoða algjörlega sitthvorn hlutinn. Þannig að ég held að bara hvað það varðar geti þetta mál ekki endað með öðrum hætti en þeim að annað hvort verði Ríkisendurskoðun falið að vinna framhaldsúttekt þar sem sérstaklega verða skoðaðar þessar athugasemdir sem Sigurður Þórðarson vekur athygli á í greinargerð sinni,“ segir Bergþór og heldur áfram: „Eins og við þekkjum þá er búið að vísa málinu til ríkissaksóknara, og menn gera það nú væntanlega ekki af neinni léttúð.“
Ólíklegt að þing komi saman
Bjarni vildi ekki geta sér til um það hvers vegna Sigurður telur brýnt að ríkissaksóknari rannsaki málið. Þingmenn Miðflokksins óskuðu eftir því í gær að þing yrði kallað saman. Forsætisráðherra sagði í samtali við fréttastofu í dag ekki eiga von á því. „Það kemur mér nú ekki á óvart. Ég held að áhugi Katrínar Jakobsdóttur forsætisráðherra á að kalla saman þing sé svona svipaður og að ganga til kosninga núna, þannig að það var viðbúið,“ segir Bergþór um viðbrögð forsætisráðherra.
Bjarni vildi ekki fullyrða neitt um það hvort engar eignir hefðu verið seldar á undirverði. „Í grófum dráttum þá gekk meðferð eignanna með þeim hætti að við fengum tugi milljarða meira út úr stöðugleikaeignunum heldur en við höfðum væntingar um í upphafi. Þannig er svona meginniðurstaðan í uppgjöri Lindarhvols stórglæsileg niðurstaða fyrir ríkissjóð.“
