Van der Sar kominn af gjörgæslu

Van der Sar, sem af mörgum er talinn einn af bestu markvörðum allra tíma, dvaldi á gjörgæsludeild í Split í Króatíu en hann var þar í fríi þegar blæddi inn á heila hans. Hann var fluttur á sjúkrahús í Hollandi á dögunum og var áfram á gjörgæslu þangað til í dag.

Í yfirlýsingu frá fjölskyldu hans í dag segist hann vera ánægður að geta deilt þeim fréttum að vera laus af gjörgæsludeildinni.

„Samt sem áður er ég áfram á sjúkrahúsi. Ég vonast til að komast heim í næstu viku og taka næsta skref í endurhæfingu minni,“ segir ennfremur í yfirlýsingunni.

Van der Sar hætti störfum sem yfirmaður knattspyrnumála hjá Ajax eftir síðastu leiktíð en hann hefur verið í stjórn félagsins síðan árið 2012, ári eftir að hann lagði hanskana á hilluna.

Á ferli sínum lék hann fyrir Ajax, Juventus, Fulham og Manchester United auk þess að leika fjölmarga leiki fyrir hollenska landsliðið.