Hættu saman í laumi ör­fáum dögum eftir þáttinn

Tíunda serían er nú í fullum gangi og nýtur mikilla vinsælda í Bretlandi. Í þáttunum keppast ungir þátttakendur við að finna ástina en skjótt skipast veður í lofti þegar nýir keppendur mæta til leiks.

Þeir sem ekki vilja láta spilla fyrir sér nýjustu þáttunum af Love Island ættu ekki að lesa lengra.

Allir hafi vitað að þetta væri búið

Breska götublaðið Daily Mail fullyrðir að þau Catherine Abaje og Elom Ahlijah-Wilson séu hætt saman. Örstutt er síðan parið datt út úr þáttunum, eða rétt rúmlega tvær vikur.

Það gerðist í kjölfar atkvæðagreiðslu meðal bresku þjóðarinnar þar sem þeim var falið að velja sterkasta parið. Öllum að óvörum duttu þau út og aðrir keppendur líkt og Scott van-der-Sluis héldust inni þrátt fyrir að vera ekki í sterku sambandi.

„Þau gátu ekki látið þetta ganga. Þau sáust varla eftir að þættirnir enduðu,“ hefur breska blaðið eftir ónefndum heimildarmanni sem er sagður þekkja til parsins fyrrverandi.

„Þau settu upp ákveðinn leikþátt um stund, á meðan þau tóku hlaðvarpsrúntinn og ræddu reynslu sína í þáttunum. Allir vissu samt að þetta hefði verið búið áður en þetta byrjaði.“

Aðdáendur þáttanna hafa margir hverjir krossað fingur í von um að Catherine muni gefa Scott annað tækifæri að þáttunum loknu. Ekki er útséð með það en ljóst að aðdáendur munu ekki fá svör við spurningum sínum um ástina þar á milli fyrr en að þáttunum loknum.