Fyrrverandi rosalega ungur vill verða formaður ungra

Magnús Jochum Pálsson skrifar 1. ágúst 2023 16:10

Gunnar Ásgrímsson vakti mikla athygli árið 2014 þegar hann var í rosalega ungum Framsóknarmönnum. Núna vill hann vera formaður Sambands ungra Framsóknarmanna. Aðsent

Gunnar Ásgrímsson hefur boðið sig fram til formanns Sambands ungra Framsóknarmanna. Gunnar vakti fyrst athygli árið 2014 í viðtali á N4 um starf rosalega ungra Framsóknarmanna.

Gunnar, sem er 23 ára Skagfirðingur og kennaranemi við Háskóla Íslands, er núverandi varaformaður Sambands ungra Framsóknarmanna og tilkynnti í dag framboð sitt til formennsku sambandsins.

Kosið verður um formann á sambandsþingi SUF sem verður haldið í Norðvesturkjördæmi helgina 1. til 3. september.

Það má segja að Gunnar sé búinn að vera íslensk netstjarna allar götur síðan tekið var viðtal við hann á N4 árið 2014.

Gunnar var þar til viðtals ásamt Róberti Smára Gunnarssyni, syni Gunnars Braga Sveinssonar, til að vekja athygli á kökubasar sem Rosalega ungir Framsóknarmenn stóðu fyrir á Sauðárkróki til styrktar Heilbrigðisstofnun Sauðárkróks.

Síðan hefur margt vatn runnið til sjávar. Róbert skipti yfir í Sjálfstæðisflokkinn en Gunnar ætlar greinilega að vinna sig hærra upp í Framsóknarflokknum.

Eins árs á fyrsta flokksþinginu

Gunnar sendi framboðstilkynningu sína á fjölmiðla í dag þar sem hann lýsir ástæðum fyrir framboði sínum og áætlunum verði hann formaður.

Þar lýsir hann því hvernig hann mætti á sitt fyrsta flokksþing Framsóknarflokksins eins árs gamall. Hann hafi fyrst tekið virkan þátt í starfi SUF fyrir fimm árum og síðustu tvö ár hafi hann verið varaformaður sambandsins undir forystu Unnar Benediktsdóttur.

Gunnar segir að þau þrjú atriði sem þurfi að einblína á næsta árið séu þrjú: að vinna áfram gott málefnastarf með virkri umræðu, styrkja félagsstarf sambandsins heima í héraði og að skapa umhverfi sem heldur betur í nýliða.

Tilkynningu Gunnars má lesa í heild sinni hér fyrir neðan:

Ég heiti Gunnar Ásgrímsson og býð mig fram til formanns Sambands ungra Framsóknarmanna.

Ég er 23 ára Skagfirðingur og er að læra grunnskólakennarann við Háskóla Íslands. Ég mætti á mitt fyrsta flokksþing eins árs gamall og má segja að vegurinn hafi alltaf leitt til virkra félagsstarfa eftir það. Ég tók fyrst virkan þátt í starfi SUF fyrir 5 árum þegar ég fór á sambandsþing á Bifröst og hef ég verið á fullu í félagsstarfinu síðan. Síðustu 2 ár hef ég hlotið þann heiður að starfa sem varaformaður SUF undir formennsku Unnar Benediktsdóttur, á þeim tíma hef ég fengið nánari innsýn inn í hvernig starfið gengur fyrir sig, bæði hvað gengur vel og hvað má gera betur.

Á síðustu miðstjórnarfundum og flokksþingum hefur ungt Framsóknarfólk verið sýnilegt og látið í sér heyra svo vel er tekið eftir innan flokksins. Enda erum við svo heppin í SUF að flokksforystan, sem og grasrótin, hlusta á okkur.

Þau áhersluatriði sem þarf að einblína á næsta árið er þrennt:

Málefnastarf:

Mikilvægt er að SUF vinni áfram gott málefnastarf innan sinna veggja svo að ungt fólk geti haft áhrif á stefnu flokksins, og þjóðfélagsumræðu, á sem skilvirkastan máta. Einnig er mikilvægt að innan SUF sé umhverfi þar sem að ungt fólk styður hvort annað á persónulegri nótum. Skapa þarf vettvang þar sem ungt fólk getur mótað sínar skoðanir í virkri umræðu við annað fólk.

Innra starf og aðildarfélög:

Þau 5 ár sem ég hef tekið þátt í starfi SUF hefur það orðið ljóst að sum FUF-félögin geta ekki haldið úti virku félagsstarfi líkt og ætlast er til af þeim. Árið 2020, þegar ég var ritari í framkvæmdastjórn Lilju Rannveigar, hófst vinna við að stofna landshlutasamtök innan SUF sem ég tel að eigi eftir að styrkja félagsstarfið heima í héraði, bæði fyrir félagsstarf ungra sem og Framsóknarfélögin sjálf..

Nýliðun:

Síðustu 5 ár hefur verið mikil nýliðun í SUF. Kosningasigur flokksins 2021 og 2022, ungt fólk í framboði og styrking SUF síðustu ár hefur haft þar mikil áhrif. Aftur á móti hefur oft reynst erfitt að halda í þá nýliða sem koma inn í starfið. Skiljanlega er stopp fólks mislangt í SUF og fólk hefur mismikla getu til að taka virkan þátt í ungliðastarfi hverju sinni, en umhverfi SUF þarf að vera þess lags að halda í það unga fólk sem vill taka þátt í starfi flokksins og að á það sé hlustað.

Vil ég því hvetja sem flesta til þess að mæta á Sambandsþing SUF sem haldið verður í Norðvesturkjördæmi 1-3 september

Framsóknarflokkurinn

Mest lesið

Fleiri fréttir