Tæp tvö ár fyrir að flytja inn rúm tvö kíló

Konan flutti kókaínið inn í fjórum pakkningum sem límdar voru við fætur hennar þegar hún kom sem farþegi með flugi frá Barselóna á Spáni.

Fyrir dómi játaði konan afdráttarlaust sök samkvæmt ákæru og samþykkti upptökukröfu ákæruvaldsins. Því var málið dómtekið án frekari sönnunarfærslu eftir að sækjandi og verjandi höfðu tjáð sig um lagaatriði máls og ákvörðun viðurlaga. Af hálfu konunnar var vægustu refsingar sem lög leyfa krafist og að gæsluvarðhald sem hún hefur sætt frá 6. júní 2023 komi til frádráttar dæmdri refsingu.

Enn eitt burðardýrið

Í dómi Héraðsdóms Reykjaness segir að af gögnum málsins að dæma verði ekki ráðið að konan hafi verið eigandi nefndra fíkniefna eða tekið þátt í skipulagningu á kaupum og innflutningi þeirra til Íslands með öðrum hætti en þeim að samþykkja að flytja efnin til landsins.

Þá hafi konan gert sér far um að aðstoða lögreglu við að upplýsa málið, meðal annars tengsl annarra við brotið. Við ákvörðun refsingar hafi verið litið til þess auk þess að hún hafi ekki áður orðið uppvís að refsiverðri háttsemi.

Á hinn bóginn yrði ekki horft fram hjá því að hún flutti til landsins verulegt magn af sterku kókaíni, sem ætlað var til söludreifingar hér á landi.

Að öllu því virtu var refsing hennar hæfilega ákveðin 22 mánuðir. Til frádráttar kemur gæsluvarðhald sem hún hefur sætt frá 6. júní.

Þá var konunni gert að þola upptöku kókaínsins auk þess að greiða alls 1.141 þúsund krónur í sakarkostnað.