Cras­hgate skandallinn vindur upp á sig: „Titlinum var rænt af honum“

Greint er frá mála­vendingunum á vef Reu­ters sem hefur undir höndunum átta síðna greinar­gerð sem lög­fræðingar Massa hafa sent á Stefa­no Do­meni­cali, fram­kvæmda­stjóra For­múlu 1 og Mohammed Ben Sula­yem, for­seta FIA þar sem að greint er frá af­stöðu Massa í málinu en kvaðir eru á um að gefa út slíkt bréf áður en málið verður tekið fyrir í dóms­sal.

Lög­fræðingar Massa segja hann hafa verið fórnar­lamb sam­særis sem hátt settir fyrrum stjórn­endur innan For­múlu 1 og FIA tóku þátt í. 

Öku­þórinn hafi, auk heims­meistara­titilsins árið 2008, orðið af um það bil tíu milljónum evra sökum vís­vitandi á­reksturs öku­manns í Singa­púr kapp­akstrinum það árið.

„Cras­hgate“ skandallinn

At­burða­rásin árið 2008 í Singa­púr kapp­akstrinum er orðin vel þekkt undir nafninu Cras­hgate skandallinn.

Massa, sem á um­ræddu tíma­bili ók fyrir hið goð­sagna­kennda lið Ferrari, hafði ræst á rás­spól og leiddi kapp­aksturinn á fjór­tánda hring þegar að Nel­son Piquet, öku­maður Renault ók utan í vegg með þeim af­leiðingum að öryggis­bíll var kallaður út.

Það hagnaðist liðs­fé­laga Piquet hjá Renault, Spán­verjanum Fernando Alon­so sem með þessu náði í skottið á Massa og vann að lokum Singa­púr kapp­aksturinn.

Ári eftir Singa­púr kapp­aksturinn steig Piquet fram og sagði liðs­stjóra Renault hafa sagt sér að aka bíl sínum utan í vegg og seinna meir voru stjórn­endur liðsins settir í bann frá móta­röðinni.

Tíma­bilið 2008 endaði Massa í öðru sæti í heims­meistara­keppni öku­manna í For­múlu 1, einu stigi á eftir Lewis Hamilton, þá öku­manni McLaren sem stóð uppi sem heims­meistari.

„Massa er rétt­mætur heims­meistari öku­manna tíma­bilið 2008. For­múla 1 og FIA hunsuðu vís­vitandi það svindl sem átti sér stað, svindl sem sá til þess að heims­meistara­titlinum var rænt af honum,“ segir lög­fræðingur Massa hjá Enyo Law lög­fræði­stofunni.

Berni­e Ecc­lestone var árið 2008 helsti stjórnandi For­múlu 1 og haft var eftir honum í mars fyrr á þessu ári að bæði hann sem og Max Mosl­ey, þá for­seti FIA, hafi vitað að Piquet hefði verið fyrir­skipað að aka utan í vegg í Singa­púr kapp­akstrinum en að þeir hafi ekkert að­hafst í málinu.

Max Mosl­ey, fyrrum for­seti FIA lést árið 2021 og Charli­e Whiting, sem var einnig einn af efstu stjórn­endum í kringum móta­röðina á þessum tíma, lést árið 2019.

Vill rétt­læti

Massa hefur áður tjáð sig um þessa at­burða­rás í sam­tali við Reu­ters fyrr á árinu og þar segist hann vilja rétt­læti.

„Ef að hæst settu stjórn­endur For­múlu 1 og FIA vissu af því hvað væri að eiga sér stað þarna árið 2008 en að­höfðust ekkert í málinu, er það sann­gjarnt?“

Í bréfi lög­fræðinganna til Do­meni­cali og Sula­yem segir að ef ekki berist á­sættan­legt svar frá þeim muni Massa leita réttar síns fyrir dóm­stólum og fara fram á skaða­bætur.

Þá vill hann stað­festingu frá þessum mönnum að ef ekki hefði komið til þessa at­burða­rásar í Singa­púr árið 2008, hefði hann orðið For­múlu 1 heims­meistari.