Red Bull getur tryggt sér snemm­búinn heims­meistara­titil í Singa­púr

Red Bull-liðið, með þá Max Verstappen og Sergio Perez innanborðs, getur tryggt sér heimsmeistaratitil bílasmiða strax um næstu helgi þegar kappt verður í Singapúr.

Liðið ber höfuð og herðar yfir önnur lið á tímabilinu og hefur unnið allar keppnir ársins hingað til. Þar fer Hollendingurinn og tvöfaldi heimsmeistarinn Max Verstappen fremstur í flokki, en hann hefur unnið tólf af fjórtán keppnum tímabilsins, en liðfélagi hans, Sergio Perez, hefur unnið tvær.

Red Bull er því með 310 stiga forskot á Mercedes sem situr í öðru sæti heimsmeistarakeppni bílasmiða nú þegar átta keppnir og þrjár sprettkeppnir eru eftir af tímabilinu. Red Bull er með 583 stig, en Mercedes aðeins 273 stig.

Það þýðir að Red Bull-liðið getur tryggt sér heimsmeistaratitil bílasmiða nú strax um helgina. Til þess að það gerist þurfa þeir Verstappen og Perez að koma í mark í fyrsta og öðru sæti og treysta svo á mistök hjá Mercedes-mönnunum Lewis Hamilton og George Russell. Ef Mercedes-liðinu mistekst að ná í stig um helgina, og Red Bull tekur 1. og 2. sæti, er Red Bull heimsmeistari.

Red Bull-liðið getur einnig orðið heimsmeistari ef Mercedes fær aðeins eitt stig á sama tíma og Verstappen og Perez taka 1. og 2. sæti og annar þeirra nær hraðasta hring.

Þá styttist einnig í að Max Verstappen geti klárað sinn þriðja heimsmeistaratitil í röð og þann þriðja á ferlinum. Hollendingurinn er með 145 stiga forskot á liðsfélaga sinn sem situr í öðru sæti, en hann getur í fyrsta lagi tryggt sér titilinn í Japan þarnæstu helgi með því að ná að minnsta kosti 180 stiga forskoti.

Miðað við meðaltal stiga á tímabilinu er þó líklegast að Max Verstappen verði krýndur heimsmeistari í Katar þann 8. október, að því gefnu að hann verði þá með að minnsta kosti 146 stiga forskot að sprettkeppni og keppni lokinni.