„Mig langaði bara að verða Íslandsmeistari sem fyrst“

„Hún er bara sturluð. Þetta er í fyrsta skipti hjá mér og þetta er bara algjör veisla,“ sagði Birnir Snær Ingason leikmaður Víkinga rétt eftir að ljóst var að liðið var orðið Íslandsmeistari í knattspyrnu í gær.

„Þetta er bara geðveikt, mig langaði bara að verða Íslandsmeistari sem fyrst,“ bætti Birnir við en Víkingur varð Íslandsmeistari í gær án þess að spila þar sem Valsmenn náðu aðeins jafntefli gegn KR.

Birnir hefur verið frábær á tímabilinu og verið einn besti leikmaður Víkinga. Hann hefur engar áhyggjur af því að liðið mæti ekki klárt í slaginn gegn Blikum í kvöld þó titillinn sé í höfn.

„Ég held ekki. Við munum nýta okkur þetta og mæta betur undirbúnir. Þetta verður geggjaður leikur. Það er eiginlega mesta spennan í byrjun hvort það verður heiðursvörður eða ekki.“

Viðtal Svövu Kristínar íþróttafréttakonu við Birni Snæ má sjá hér fyrir neðan.