Fjölmenntu til að upplifa kynþokka og spennu í nýrri þáttaröð

Aníta hélt tölu fyrir frumsýninguna og sagði frá ferlinu við skrifin sem hefðu tekið sjö ár. Draumur væri að verða að veruleika. Þá þakkaði hún Stöð 2 og Glassriver fyrir að hafa tekið slaginn með nýjum handritshöfundi en Aníta hefur til þessa einbeitt sér að leiknum.

Aníta fer með hlutverk Betu sem eitt sinn var efnileg tónlistarkona, finnur sig í ónýtu hjónabandi, ekki verandi sú móðir sem hún vill vera. Martin Wallström leikur eiginmann Anítu.

Þegar ungur maður, sem Mikael Kaaber leikur, flytur inn á heimilið til að hjálpa með barnið og fer að leggja til „daður-verkefni“ fyrir hjónin, er Beta þvinguð til að taka áhættur og stíga aftur inn í lífið.

Katla Margrét Þorgeirsdóttir leikur móður Anítu og leikstjórn er í höndum Katrínar Björgvinsdóttur.

Mikill fjöldi gesta lagði leið sína á forsýninguna í gær þar sem leikarar og aðrir aðstandendur þáttanna fögnuðu saman. Hafþór Waldorff, kærasti Anítu, sat að sjálfsögðu við hlið sinnar heittelskuðu en hann kemur að sviðsetningu þáttanna.