Hannaði sófa úr ó­not­hæfum töskum

Hér má sjá viðtalið við Rebekku Ashley í heild sinni: 

Rebekka hefur alltaf tjáð sig í gegnum hönnun og tísku og segist alla tíð hafa haft þörf til að skapa og búa eitthvað til. Þegar hún tók loks skrefið að sækja um í vöruhönnunarnám við Listaháskóla Íslands var ekki aftur snúið. Hönnunin var orðin órjúfanlegur hluti af hennar lífi.

Gallaðir rennilásar urðu að listrænum sófa

Það skiptir hana miklu máli að vera vistvæn í sinni listsköpun og eru rafmagnssnúrur sem dæmi vinsæll efniviður hjá henni. Þær hafa nýst henni við gerð á ljósakrónum, lömpum og flíkum svo eitthvað sé nefnt. Hún tók svo þátt í verkefni með Icelandair sem snérist um að finna farveg fyrir gallaðar tölvutöskur. 

„Þau pöntuðu rosalegt magn af töskum en rennilásarnir á þeim voru allir gallaðir. Þau sátu því uppi með tíu kassa af þessum tölvutöskum.“

Í kjölfarið nálguðust þau Rebekku til að athuga hvort það væri eitthvað hægt að gera. Hún fékk þá strax hugmynd.

„Mig langaði að búa til eitthvað eitt stórt úr öllum þessum töskum og gerði því sófa og fyllti hann með tölvutöskunum og gömlum koddum og dýnum og alls konar. Hugmyndin var að búa til eitt stórt úr fullt af litlum ónýtum hlutum.“

Sófinn mun standa í nýjum höfuðstöðvum Icelandair. Aðspurð hvort að það sé þægilegt að slaka á í sófanum segir Rebekka hlæjandi:

„Já, það er alveg allt í lagi að chilla í honum. Þetta er ekkert þægilegasti sófi í heiminum en þetta er allavega listrænn skúlptúr. Þetta er samt ekki bara flott að horfa á þetta upp á punktið heldur er notagildi í þessu og ég vil að það sé hægt að nota hann. 

Fegurðin er í því að nota hlutina til enda, endurvinna þá svo, nota þá svo aftur og svo koll af kolli“, segir Rebekka að lokum um ástríðu sína fyrir vistvænni hönnun. 

Þættirnir KÚNST með Dóru Júlíu rannsaka hinar ýmsu víddir listsköpunar, ólíka listmiðla og sköpunargleði hjá íslenskum samtíma listamönnum ásamt því að fá að skyggnast bak við tjöldin og heyra um persónulegt líf þeirra.