Frekari sala í Ís­landsbanka geti ekki farið fram með Sjálf­­stæðis­­flokk í for­ystu

Sigurður Ingi Jóhanns­son, for­maður Fram­sóknar­flokksins og inn­viða­ráð­herra, sagði mikil­vægt að stjórn­völd og aðilar vinnu­markaðar vinni í sam­einingu á háu vaxta­stigi og verð­bólgu á Ís­landi. Hann sagði ríkis­stjórnina með­vitaða um að þetta væru stærstu verk­efnin fram undan og að þau hefðu axlað á­byrgð með því að breyta skipan ríkis­stjórnar í síðustu viku.

Þor­gerður Katrín Gunnars­dóttir, for­maður Við­reisnar, og Sigurður Ingi voru gestir Kristjáns Kristjáns­sonar í Sprengi­sandi í dag.

Þau byrjuðu á því að tala um á­kvörðun formanns Sjálf­stæðis­flokksins að hætta sem fjár­mála­ráð­herra. Þor­gerður sagði að hennar mati hefði verið betra að em­bættið hefði verið fært til þing­manns í annað hvort flokki Fram­sóknar eða Vinstri grænna.

„Frá­farandi fjár­mála­ráð­herra skilur ekkert eftir sér­stakt bú,“ sagði Þor­gerður Katrín um Bjarna og að arf­leifð hans „væri ekkert sér­stök“ í fjár­mála­ráðu­neytinu.

Spurningum um verkefnin ósvarað

Hún sagði spurningum um stór verk­efni innan ríkis­stjórnarinnar enn ó­svarað. Það sem hefði komið fram í gær væri að ríkis­stjórnin væru „mjög peppuð“ sem væri vel, en það þyrfti meira.

Kristján spurði Sigurð Inga hvort ríkis­stjórnin tæki ekki álit um­boðs­manns al­var­lega. Hann sagðist sam­mála niður­stöðu Bjarna í þessu máli, að hann gæti ekki lengur starfað sem fjár­mála­ráð­herra, og að við­brögð hans séu skýr og hann axli á­byrgð með því að hætta.

Hann sagði Þor­gerði Katrínu djarfa, sem fyrr­verandi vara­for­maður Sjálf­stæðis­flokksins, að segja að Sjálf­stæðis­flokkurinn sé of tengdur fjár­mála­kerfinu og geti því ekki stjórnað klárað söluna á hlut ríkisins í Íslandsbanka. Hann telji Vinstri græn eða Fram­sókn alveg geta það en í grunninn treysti hann ríkis­stjórninni til að gera það.

„Ég treysti ein­fald­lega ríkis­stjórninni til þessa verk­efnis,“ sagði Sigurður. 

Þor­gerður svaraði því og sagði gott að tala um reynslu, bæði slæma og góða. Hún fagnaði því að Sigurður Ingi væri loks kominn til leiks og sagði at­burða­rás vikunnar sýna að Fram­sókn væri „auka hjól undir vagni ríkis­stjórnarinnar“.

„Hann virtist koma al­ger­lega af fjöllum for­maður Fram­sóknar­flokksins um fram­vinduna, en gott og vel, hann vill þá bara nota stjórnar­and­stöðuna til að kveikja og vekja sig,“ sagði Þor­gerður Katrín

Hún sagði á­fram­haldandi sölu á hlut ríkisins í Ís­lands­banka ekki geta farið fram á meðan Sjálf­stæðis­flokkurinn væri enn í fjár­mála­ráðu­neytinu og gagn­rýndi að það væri í raun ekkert verið að reyna að læra af á­liti um­boðs­manns.

„Það skiptir svo miklu máli að reyna að læra af reynslunni,“ sagði hún.

Stólaskipti rándýrrar ríkisstjórnar

Þau ræddu einnig erfiða stöðu bænda í háu vaxta­stigi og mikinn fjár­magns­kostnað sem til dæmis hamli ný­liðun í greininni.

„Þetta er það sem við verðum að reyna að horfast í augu við í sam­fé­laginu. Að þessi rán­dýra ríkis­stjórn, sem að gerir ekki annað en að fara í stóla­skipti. Það var bent á það í gær að það væri eins og hún væri að setja sig í öndunar­vél næstu tvö árin. Gott og vel, en þetta er dýrt fyrir sam­fé­lagið.“

Eftir að ræddi hún erfiða fjár­hags­stöðu al­mennings og að það væri vegna verka ríkis­stjórnarinnar. Það þyrfti að bregðast við þessu og taka á­kvarðanir. Hún fengi reglu­lega pósta frá fólki sem hafi á­hyggjur af börnunum sínum. Af­borganir hús­næðis­lána þeirra séu að fara úr 150 þúsund í 350 þúsund og þau ráði ekki við það

„Þetta eru kennarar. Þetta eru raf­virkjar og hjúkrunar­fólk. Það getur ekki staðið í þessu,“ sagði hún og að auk þess væri matar­karfan hér sú hæsta í Evrópu.

Bongóblíða hjá ríkisstjórninni

„Allt þetta hefur gerst á vakt þessarar ríkis­stjórnar og það er bara bongó­blíða hjá ríkis­stjórninni. Sigurður Ingi segir bara: Þor­gerður, sérðu ekki veisluna sem við höfum búið við?“ sagði Þor­gerður og að ríkis­stjórnin þyrfti að ganga til verka í fleiri málum, eins og orku­málum.

Þau ræddu svo ítar­lega vaxta­stig í landinu, háa verð­bólgu og erfiða stöðu al­mennings og voru ó­sam­mála bæði um stöðuna og þær að­gerðir sem hefði verið gripið til núna og í tíð ríkis­stjórnarinnar. Sigurður Ingi vísaði mál­flutningi Þor­gerðar Katrínar um að hér væri allt hræði­legt á bug og benti á góðan af­gang ríkis­sjóðs síðustu tvö árin.

„Ég sagði aldrei að það væri veisla. Ég sagði bara í hlut­falli við önnur ríki þar sem menn eru kljást við meiri af­leiðingar af heims­far­aldri vegna þess að þeir gerðu ekki eins vel og við,“ sagði Sigurður og að stríðið í Úkraínu hefði auk þess meiri á­hrif annars staðar en hér. Þess vegna væru okkar á­skoranir minni en annarri þjóða. Kaup­máttur væri meiri og at­vinnu­leysi minna. En verð­bólgan væri orðin of há, en væri sjálf­keyrandi hér innan­lands og það væri hægt að taka á henni hér.

Hann sagðist þó sam­mála Þor­gerði um eitt og að það væri að Ís­land væri að borga of háa vaxta­gjöld og að hægt væri að gera betur. Ís­land væri í sama flokki og lönd sem eru við það að verða gjald­þrota og þetta væri liður sem væri sá þriðji stærsti í fjár­lögum.

„Við ættum að vera komin með allt annað vaxta­stig með þetta fjöl­breytta hag­kerfi sem við erum komin með í dag. Það er ekki ein­hæft eins og það var fyrir 30 til 40 árum,“ sagði Sigurður Ingi og að hann vilji leggja meiri á­herslu á þetta. Það skipti máli fyrir af­komuna og um­ræðuna í þinginu.

Þau ræddu einnig stöðuna á hús­næðis­markaði í tengslum við þenslu en eitt af mark­miðum ráðu­neytis Sigurðar Inga er að byggja meira. Hann sagði það erfitt í nú­verandi vaxta­stigi en að það væri verið að byggja undir við­kvæma hópa á við­ráðan­legu verði. Þannig væri markaðurinn gerður betri fyrir þau tekju­lægstu.

Þor­gerður Katrín sagði að það þyrfti að fara nýjar leiðir svo að barna­börn þeirra myndu ekki búa við marg­falt hærri vexti en löndin í kringum þau.

Við­talið er lengra og er hægt að hlusta á það í heild sinni hér að ofan.