Hver átti sprengjuna?

Sprengingin hefur leitt til umfangsmikilla mótmæla í Mið-Austurlöndum og mikillar reiði í garð Ísraela og bakhjarla þeirra. Fyrir sprenginguna í gær höfðu þúsundir borgara fallið í árásum Ísraela á Gasaströndinni síðan vígamenn Hamas gerðu mannskæða árás á Ísrael 7. október.

Ísraelar segjast ekki hafa varpað sprengju á sjúkrahúsið heldur hafi eldflaug sem vígamenn Íslamsks jihad skutu í átt að Ísrael hrapað til jarðar við sjúkrahúsið og valdið sprengingunni.

Joe Biden, forseti Bandaríkjanna, hefur sagt að útlit sé fyrir að „hin hliðin“, það er ekki Ísraelar, beri ábyrgð á sprengingunni. Hann var spurður nánar út í hvernig hann teldi sig vita það. Vísaði hann í gögn frá varnarmálaráðuneyti sínu.

Í dag hafa upplýsingar litið dagsins ljós sem renna stoðum undir að eldflaug hafi bilað og fallið til jarðar við sjúkrahúsið.

Fönguðu eldflaug hrapa til jarðar

Meðal nýrra upplýsinga er myndband sem tekið var af tökumanni Al Jazeera fréttastofunnar. Það sýnir eldflaug skotið á loft frá Gasa. Þar sést eitthvað koma upp á og springur eldflaugin í loft upp skömmu síðar. Einhverjir hlutar úr eldflauginni virðast hafa fallið til jarðar og verða tvær sprengingar vegna þeirra.

Myndatökumaðurinn beindi myndavél sinni að fyrri sprengingunni og fangaði um leið þá síðari.

Umrætt myndband má sjá hér að neðan en það hefur meðal annars verið birt á samfélagsmiðlum ísraelska hersins.

Þegar seinni sprengingin verður og myndatökumaðurinn tekur nærmynd, má sjá grindur ofan á húsinu við sprenginguna. Það eru eins grindur og eru á byggingum sjúkrahússins.

Ísraelskur blaðamaður birti myndbandið hér að neðan sem er sagt hafa verið tekið upp um það leyti sem sprengingin varð. Það sýnir fjölda eldflauga skotið á loft frá Gasasvæðinu og stóra sprengingu skömmu síðar.

Í dag hafa margar myndir verið teknar frá sjúkrahúsinu og þar á meðal þessi að neðan, sem ljósmyndari Reuters tók. Sú mynd sýnir gíg sem virðist vera eftir að sprengja féll til jarðar. Gígurinn er á bílastæði við sjúkrahúsið og virðist sprengingin hafa valdið litlum skemmdum á húsum þar nærri.

Myndefni frá deginum bendir til þess að lítil höggbylgja hafi myndast við sprenginguna og þess í stað hafi komið töluverður eldur.

Hér að neðan má sjá myndband af Instagram sem tekið var upp við sjúkrahúsið í dag. Þar að neðan er svo mynd sem ljósmyndari tók af gíg við húsið. Enn sem komið er er þetta eini gígurinn sem hefur sést.

Talsmenn ísraelska hersins segja að ef þeir hefðu gert loftárás á sjúkrahúsið hefði gígurinn verið mun stærri. Þar að auki segja sérfræðingar að skemmdirnar á sjúkrahúsinu og nærliggjandi byggingum hefðu verið mun meiri við hefðbundna loftárás.

Hundruð þúsunda Palestínumanna eru á vergangi vegna ítrekaðra loftárása Ísraela og er útlit fyrir að hópur þeirra hafi verið sofandi í garði sjúkrahússins, sem gæti útskýrt hve margir eru sagðir hafa fallið í sprengingunni.

Ísraelski herinn birti upptöku í morgun sem er sögð vera af símtali milli vígamanna Hamas, eftir sprenginguna. Ísraelar segjast hafa hlerað símtalið og það bendi einnig til þess að eldflaug frá Íslömsku jihad sé um að kenna.

Enskum texta hefur verið bætt við myndbandið hér að neðan.

Hafa áður sagt ósatt

Ísraelar hafa áður sagt að herinn beri ekki ábyrgð á einhverju, sem reyndist svo rangt. Nýjasta dæmið er morðið á Shireen Abu Akleh, fréttakonu Al Jazeera. Hún var skotin til bana á Vesturbakkanum í fyrra.

Þá voru ísraelskir hermenn að skiptast á skotum við Palestínumenn og fréttakonan var á gangi í hverfinu, en þó nokkuð langt frá. Þau urðu fyrir skothríð sem banaði Shireen Abu Akleh.

Palestínskir embættismenn á Vesturbakkanum sökuðu ísraelska hermenn um að hafa skotið hana.

Ísraelskir embættismenn drógu það í efa og sökuðu palestínska menn um skothríðina. Herinn gerði svo rannsókn þar sem komist var að þeirri niðurstöðu að ómögulegt væri að finan uppruna skothríðarinnar.

Blaðamenn New York Times komust þó að þeirri niðurstöðu, eftir mikla rannsóknarvinnu, að skothríðin hefði komið frá ísraelskum hermönnum sem höfðu verið þar nærri og að engir vopnaðir Palestínumenn hefðu verið á svæðinu.