Fjölda flug­ferða af­lýst eða flýtt

Þetta staðfestir Guðjón Helgason, upplýsingafulltrúi Isavia, í samtali við Vísi. Hann segir að slæmu veðri sé spáð á Reykjanesinu síðdegis í dag og fram á morgun. Spár geri ráð fyrir því að vindhraði gæti náð fimmtíu hnútum, sem er viðmiðunarhraði fyrir notkun landganga.

Þá hafi Isavia fundað með flugfélögum sem hafi í kjölfarið tekið ákvörðun um flýtingu eða aflýsingu fjölda flugferða.

Á vef Isavia má sjá að nokkrum flugferðum eftir klukkan 15:25 hefur verið aflýst og ferðum íslensku flugfélaganna tveggja sem voru á áætlun eftir klukkan 16 hefur verið flýtt. Þá hefur öllum flugferðum á áætlun eftir klukkan 18 verið aflýst.

Guðjón hvetur alla þá sem eiga bókaðar flugferðir í dag og í fyrramálið að fylgjast vel með veðurspám og tilkynningum frá Isavia og flugfélögum.