Þakkar þriðju­dagur

Fyrirbærið hefur ekki farið hátt hér á landi en nú hafa Heimilistæki og tengdar verslanir ákveðið að halda daginn hátíðlegan í fyrsta sinn.

Í dag, þriðjudaginn 28. nóvember, mun 10% af allri sölu verslana og netverslana Heimilistækja, Tölvulistans, Raflands, Kúnígúnd, Byggt og búið og Iittala búðarinnar því renna til endurhæfingar- og stuðningsmiðstöðvar Ljóssins.

„Með því að gera Þakkar þriðjudegi hátt undir höfði viljum við skila þakklæti út í samfélagið og gefa til baka í kjölfarið á stórum tilboðsdögum í nóvember,“ segir Dísa Sigurðardóttir, markaðsfulltrúi Heimilistækja.

„Við báðum starfsfólkið okkar að senda inn tillögur um góðgerðamál og bárust margar flottar tillögur. Að lokum voru valin fimm góðgerðafélög sem starfsfólk kaus síðan á milli. Úr varð að Ljósið hlýtur styrkinn í ár okkur öllum til mikillar ánægju enda mikilvægt starf sem þar er unnið og krabbamein eitthvað sem snertir okkur flest einhvern tímann á lífsleiðinni.“

Ljósið er endurhæfingar- og stuðningsmiðstöð fyrir fólk sem hefur fengið krabbamein og aðstandendur þess en þangað getur fólk leitað til þess að fá aðstoð við að byggja upp þrek, auka virkni og bæta lífsgæði sín. Ljósið býður upp á fjölbreytta dagskrá, m.a. námskeið, fræðslufundi, líkamsrækt, nudd og margt fleira sem gagnast krabbameinsgreindum og aðstandendum þeirra.

Á vefsíðu Ljóssins má finna frekari upplýsingar um starfsemina.