Stakk Chauvin 22 sinnum

Fanginn sem um ræðir heitir John Tursack og er 52 ára. Hann afplánar nú 30 ára fangelsisdóm vegna hinna ýmsu brota sem hann framdi á meðan hann var uppljóstrari á vegum bandarísku alríkislögreglunnar. Tursack hefur setið inni frá árinu 2001. 

Í yfirheyrslum sagðist Tursack, sem áður var meðlimur í mexíkósku glæpagengi, fyrst hafa fengið þá hugdettu að ráða Chauvin bana fyrir um mánuði. Hann hafi valið daginn, föstudaginn í síðustu viku, af táknrænum ástæðum. 

Þann daginn halda Bandaríkjamenn upp á „Svartan föstudag“ (e. Black Friday), og þótti Tursack viðeigandi að ráðast þá á Chauvin, með vísan til Black Lives Matter-hreyfingarinnar. Morð Chauvins, sem var lögreglumaður í Minnesota, á Floyd í vakti gríðarlega hörð viðbrögð víða um heim og vakti upp háværar umræður um ofbeldi lögreglumanna í garð svarts fólks. 

Dró fyrri yfirlýsingar til baka

Tursack er þá sagður hafa haldið því fram að hann hefði drepið Chauvin ef fangaverðir hefðu ekki stöðvað hann. Hann virðist þó nú hafa dregið til baka yfirlýsingar um að hann hefði haft ásetning til að myrða Chauvin. 

Dómsmálaráðherra Minnesota, Keith Ellison, sagðist hryggur yfir árásinni. Chauvin var sóttur til saka í krafti embættis hans.

„Hann var réttilega dæmdur fyrir afbrot sín og rétt eins og hver annar maður í fangelsi ætti hann að geta afplánað dóm sinn án þess að lifa í ótta um hefndaraðgerðir eða ofbeldi,“ sagði í yfirlýsingu frá ráðherranum. 

Chauvin var sakfelldur í sjö ákæruliðum og afplánar nú 22 og hálfs árs fangelsisdóm.