Maggi Gunn valdi bestu skyttur Subway deildarinnar

Það er enginn vafi á því að Magnús hefði verið á flestum svona listum á meðan hann var að spila enda í fjórða sæti yfir flestar þriggja stiga körfur í sögu deildarinnar með 867 í deildinni og svo með 252 þrista að auki í úrslitakeppninni þar sem hann er í þriðja sætinu.

Magnús er því einn af fjórum leikmönnum sem hafa skorað yfir þúsund þriggja stiga körfur á Íslandsmóti, það er í deild plús úrslitakeppni. Hinir eru Guðjón Skúlason, Páll Axel Vilbergsson og Brynjar Þór Björnsson.

Stefán Árni Pálsson, umsjónarmaður Körfuboltakvölds, vildi fá að vita það hvort Ville Tahvanainen væri einn af bestu skotmönnunum í deildinni en hann hafði rétt áður raðað niður risastórum þriggja stiga körfum þegar Álftanes vann Stjörnuna í framlengdum leik.

„Nei því miður. Hann kannski slefar í sjötta eða sjöunda sætið,“ svaraði Magnús.

„Hann sannaði sig svolítið í kvöld,“ sagði Stefán Árni. Ville Tahvanainen skoraði fimm þriggja stiga körfur í leiknum og það úr aðeins átta skotum.

„Þetta er einn leikur og við gefum honum séns,“ sagði Magnús.

„Hverjir eru bestu skotmennirnir í deildinni að þínu mati,“ spurði Stefán í framhaldinu.

„Við ætlum að byrja á þeim sem komust ekki inn á listann en eru geggjaðir samt,“ sagði Magnús.

Hér fyrir neðan má sjá Magnús fara yfir listann yfir bestu skytturnar að hans mati.