Viðskipti innlent

Verð­bólga byrji að hjaðna hratt á nýju ári

Bjarki Sigurðsson skrifar
Því er spáð að verðbólgan verði í sjö prósentum í mars á næsta ári.
Því er spáð að verðbólgan verði í sjö prósentum í mars á næsta ári. Vísir/Vilhelm

Hagfræðideild Íslandsbanka spáir því að verðbólga muni aukast í desember úr átta prósentum í 8,3 prósent. Eftir áramót muni hún hins vegar byrja að hjaðna og verði komin niður í sjö prósent í mars. 

Þetta kemur fram í nýrri greiningu deildarinnar. Því er spáð að vísitala neysluverðs hækki um 0,9 prósent milli mánaða og ársverðbólgan verði þannig 8,3 prósent. 

Skýring Seðlabankans á hvað verðbólga er:

Verðbólga er skilgreind sem viðvarandi hækkun almenns verðlags og er mæld sem tólf mánaða breyting vísitölu neysluverðs. Sú vísitala mælir meðalverð á vörum og þjónustu sem heimili á Íslandi kaupa í hverjum mánuði. Verðbólga felur í sér að verðgildi og kaupmáttur peninga minnkar, þ.e.a.s. minna magn vöru og þjónustu fæst fyrir hverja krónu.

Hækkun á flugfargjöldum er það sem vegur hvað mest til hækkunar í desember. Samkvæmt spá Íslandsbanka hækka þau um 20,5 prósent en um er að ræða árstíðabundna hækkun í aðdraganda jóla. Á móti vegur að eldsneytisverð lækkar um 0,9 prósent. 

Nánar má lesa um greiningu Íslandsbanka hér. 

Neytendur Verðlag Fjármál heimilisins Efnahagsmál Íslenska krónan


Mest lesið


Fleiri fréttir

Sjá meira


×

Mest lesið