Greiði mæðgunum ríf­lega tuttugu milljarða

Mæðgurnar Ruby Freeman og Wandrea Moss sökuðu Giuliani um að hafa valdið þeim tilfinningalegum skaða og mannorðshnekki auk þess að stefna öryggi þeirra í hættu með lygum hans, um að þær hefðu átt við atkvæði við talningu eftir forsetakosningarnar árið 2020.

Alríkisdómstóll í Bandaríkjunum úrskurðaði í ágúst síðastliðnum að Giuliani hefði gefið mál sem mæðgurnar höfðuðu á hendur honum með því að afhenda ekki rafræn gögn sem þeir kröfðust í málinu.

Að loknum fjögurra daga réttarhöldum komst átta manna kviðdómur að þeirri niðurstöðu í gær að Giuliani skyldi greiða mæðgunum alls 148 milljónir dala í miska- og skaðabætur. Tuttugu milljónir dala í skaðabætur vegna meiðyrða og sextán milljónir í miskabætur vegna andlegs miska á mann auk 75 milljóna í refsibætur, sem deilast á milli mæðgnanna.

Ósennilegt verður að teljast að Giuliani sé borgunarmaður fyrir bótunum en að sögn CBS eru auðæfi hans metin á um fimmtíu milljónir dala.