Aftur­elding valin besta nor­ræna sjónvarpsserían

Umræddur gagnrýnandi heitir Kjell Häglund og segir Aftureldingu eina bestu íþróttaseríu sem hann hafi séð. 

„Serían er virkilega spennandi og ófyrisjáanleg, bæði íþróttalega- og sáflræðilega,“ skrifar Kjell meðal annars og hrósar leikurum sérstaklega. Þorsteinn Bachmann standi þó fremstur meðal jafningja. „Drepfyndin túlkun á formanni klúbbsins, sem reynist á endanum vera hið mesta svín.“

Svíarnir með sama kúltúr

Halldór segir umfjöllunina mikinn heiður enda um stærsta sjónvarpsgagnrýnanda Svíþjóðar að ræða.

„Við heyrðum af því í sumar að serían væri að spilast vel í Svíþjóð, það var komin dagskrárgerð um seríuna og tala við handboltafólk og fleira. Það er gott að taka þetta pepp inn í áframhaldandi skrif á nýju seríunni,“ segir Halldór í samtali við Vísi.

Hann segir að Skandinavíulöndin virðist taka sérstaklega vel í seríuna. 

„Svíarnir eru alveg sjúkir í Aftueldingu. Ég talaði við mann sem sagði að það sé í raun svona sami íþróttahúsakúltúr þar og hér á Íslandi. Þar sem íþróttahúsin verða miðstöð lítils bæjar þar sem allir fara í gegn, óháð því hvað er að ske. Tímarnir breytast en íþróttahúsin eru alltaf þarna. 

Þessi maður var nú að velta fyrir sér af hverju Afturelding hafi leyft okkur að ganga svona nærri þeim og ég man vel hvað Afturelding sagði, þau sögðu: „við erum bara íþróttafélag bæjarins og verðum að þola að vera hluti af þeim sögum sem sagðar eru úr bænum“. Mér fannst það bara stórt hugsað hjá þeim,“ segir Halldór að lokum.