Hólm­fríður óttaðist um líf sitt

Þetta kemur fram í viðtali við Hólmfríði á vef Sunnlenska í gær. Þessi 39 ára Rangæingur spilaði síðast fótbolta með Selfossi í fyrrasumar en hefur haldið sér í góðu formi áfram eftir að takkaskórnir fóru í hilluna, og segir það hafa hjálpað sér mikið í veikindunum á þessu ári.

Hólmfríður veiktist í lok janúar og fór á bráðamóttöku HSU á Selfossi, en það tók læknana sinn tíma að finna út hvað væri að hrjá hana. Hún kveðst hafa fengið mikla verki frá lungunum, stingi og mjög háan hita, en að lyf sem hún hafi verið send heim með í upphafi hafi ekki slegið á hitann eða verkina.

„Ég var mætt aftur upp á spítala eftir tvo tíma af því að ég vissi að það væri eitthvað að. Ég er þannig gerð að ég harka eiginlega allt af mér. Ég hitti sama lækninn sem var hissa að sjá mig og spyr hvort ég sé komin aftur. Ég sagði að ég þyrfti hjálp,“ segir Hólmfríður í viðtalinu við Sunnlenska.

Bakteríusýking, lungnabólga og inflúensa

„Í framhaldinu voru teknar blóðprufur sem litu ekkert svo vel út. Um nóttina var ég sprautuð með morfíni á tveggja tíma fresti því að ég var svo rosalega verkjuð. Ég man voðalega lítið eftir þessum tíma, ég var bara í móki. Það tók alveg tvo þrjá daga að finna út hvað væri að hrjá mig. Það voru bara allir að hrista hausinn og vissu ekkert hvað var að. Það voru líka sérfræðingar í Reykjavík, blóðmeinafræðingar og fleiri, sem voru að reyna að hjálpa og reyna að finna út hvað væri að mér,“ segir Hólmfríður.

Í ljós kom að hún var með bakteríusýkingu, lungnabólgu og inflúensu. Hólmfríður kveðst hafa verið mjög kvalin en hún var samt send heim af spítalanum. Morguninn eftir var hún mætt aftur og var þá send beint í einangrun. 

„Það mátti enginn koma inn til mín og læknar máttu bara koma inn til mín í sérstökum varnarbúningum. Ég var þá komin í einangrun því að ég hefði ekki mátt við neinu í viðbót. Ég þurfti að fá sér eldaðan mat því að hvítu blóðkornin voru alveg búin að tæma sig og CRP gildið var komið í 220 en það er venjulega ekki hærra en 10 hjá fólki.“

„Heppin að hafa náð mér af þessu“

Hún hafi svo á endanum fengið sterkustu sýklalyf beint í æð og einnig súrefni. Læknir hafi síðar sagt hana verið mjög hætt komna.

„Ég er líka með tvö lítil börn svo það var mjög erfitt að verða svona mikið veik og óttast um líf sitt,“ segir Hólmfríður.

Fyrstu mánuðina eftir veikindin átti Hólmfríður, sem þekkt er fyrir kraft sinn á fótboltavellinum, mjög erfitt með að labba þó ekki væri nema fimmtíu metra. Í lok júlí hafi hún verið farin að hlaupa 1-2 kílómetra. 

Núna líður henni mun betur og síðustu blóðprufur, sem teknar voru í desember, komu vel út. Og Hólmfríður er þakklát fyrir að hafa endurheimt orkuna sína.

„Það var fullt af fólki að veikjast á þessum tíma og ég er bara heppin að hafa náð mér af þessu. Líka þegar ég fékk súrefnið, þegar ég var farin að metta mjög illa, það leit ekki vel út. Þetta fer inn í reynslubankann að veikjast svona og maður lærir að taka ekki heilsunni sem sjálfsögðum hlut.“