Arnar Gunn­laugs­son þjálfari ársins

Þetta er í fyrsta sinn sem Arnar hlýtur þessa nafnbót. Á árinu 2023 varð Víkingur tvöfaldur meistari undir hans stjórn, vann Bestu deildina og Mjólkurbikarinn. Síðan Arnar tók við Víkingum haustið 2018 hafa þeir unnið sex stóra titla og bikarkeppnina meðal annars fjórum sinnum í röð.

Arnar fékk afgerandi kosningu, eða 122 stig, áttatíu stigum meira en Þórir Hergeirsson, þjálfari norska kvennalandsliðsins í handbolta, sem varð í 2. sæti í kjörinu. Undir stjórn Þóris lenti Noregur í 2. sæti á HM í síðasta mánuði.

Pavel Ermolinskij, þjálfari Tindastóls í körfubolta karla, varð í 3. sæti í kjörinu. Hann gerði Stólana að Íslandsmeisturum í fyrsta sinn síðasta vor.

Alls tóku 28 íþróttafréttamenn þátt í kjörinu og valdi hver og einn þrjá bestu þjálfara ársins að sínu mati. Fimm stig fengust fyrir efsta sæti, þrjú fyrir 2. sæti og eitt stig fyrir það þriðja.

Þjálfari ársins