Freyr gerði fimm missera samning

Samkvæmt frétt á heimasíðu Kortrijk nú í morgun mun Freyr hefja störf á morgun, en fyrsti leikur Kortrijk undir hans stjórn er gegn Standard Liege 20. janúar, þegar vetrarfríi í Belgíu lýkur.

Jonathan Hartmann, sem var aðstoðarmaður Freys hjá Lyngby, fylgir honum og verður aðstoðarþjálfari Kortrijk.

Eins og fjallað var um á Vísi í gær er Freyr á leiðinni í afar krefjandi starf því Kortrijk er neðst í belgísku A-deildinni, með tíu stig eftir tuttugu leiki. Hann er þriðji þjálfari liðsins á þessari leiktíð og hefur félagið ítrekað skipt um þjálfara síðasta áratug, eftir að malasíski auðjöfurinn Vincent Tan eignaðist það.

Freyr var samningsbundinn danska félaginu Lyngby en Kortrijk keypti hann þaðan. Freyr kom Lyngby upp í efstu deild í Danmörku, hélt liðinu þar uppi á síðustu leiktíð og skilur við það um miðja deild.

Áður hefur Freyr meðal annars þjálfað kvennalandslið Íslands og verið aðstoðarþjálfari karlalandsliðsins.

Freyr mun þurfa að hafa hraðar hendur við að kynnast nýja leikmannahópnum sínum, sem er vægast sagt fjölþjóðlegur. Í hópnum eru menn frá alls 18 löndum, og nú bætist við íslenskur þjálfari.

Það verður svo að koma í ljós hvort að Freyr sækir til sín íslenska leikmenn líkt og hann gerði hjá Lyngby, en hjá danska félaginu í dag eru fjórir íslenskir leikmenn, þeir Gylfi Þór Sigurðsson, Andri Lucas Guðjohnsen, Sævar Atli Magússon og Kolbeinn Finnsson.