Binda enda á 27 ára sam­starf sitt

Greint var frá þessu í gær. Woods, sem er einn sigursælasti kylfingur sögunnar, hefur notast við vörur og búnað frá Nike og auglýst merkið allt frá því að hann gerðist atvinnumaður í golfi árið 1996.

Woods sagði frá því á samfélagsmiðlum í gær að þetta tímabil hafi verið uppfullt af stórkostlegum augnablikum og minningum. „Ef ég myndi byrja að nefna þau þá gæti ég haldið áfram endalaust,“ sagði Woods sem hefur unnið fimmtán stórmót á ferli sínum.

Að sama skapi segir í yfirlýsingu frá Nike að það hafi verið mikill heiður að starfa með „einum af stærstu íþróttamönnum sögunnar“.

Woods skrifaði árið 1996, þegar hann var tvítugur og gerðist atvinnumaður, undir fimm ára auglýsinga- og samstarfssamning við Nike sem hljóðaði upp á fjörutíu milljónir Bandaríkjadala, en Nike hafði á þeim tíma ekki náð mikilli fótfestu innan golfíþróttarinnar.

Samningurinn átti eftir að verða einn sá farsælasti í sögu íþrótta, enda bar Woods höfuð og herðar yfir aðra kylfinga um langt tímabil. Áttu Woods og Nike meðal annars eftir að ná saman um tíu ára samstarfssamning þar sem 200 milljónir dala komu í hlut Woods.

Woods, sem nú er 48 ára gamall, skipar nú annað sæti yfir þá sem hafa unnið flest stórmót í golfi, en einungis Jack Nicklaus hefur unnið fleiri, eða átján. 

Tiger Woods vann síðast stórmót árið 2019 þegar lann landaði titlinum á US Masters á Augustavellinum.