Mikilvægt að finna jafnvægið í áramótaheitunum

Dóra Júlía Agnarsdóttir skrifar 15. janúar 2024 11:19

Þóra Rós stendur fyrir viðburðinum Heil helgi á Hótel Kviku. Aðsend

Jógakennarinn Þóra Rós Guðbjartsdóttir segir að fólk eigi í hættu á að fara of geyst af stað í janúar út frá háleitum áramótaheitum. Mikilvægast sé að tileinka sér jafnvægi en hún leggur sjálf mikið upp úr því. Þóra Rós stendur fyrir jógaviðburði á Hótel Kviku þar sem hún deilir því sem hún sjálf hefur lært á sinni vegferð.

Þóra Rós deilir jógastöðu vikunnar hér á Vísi þar sem hún kennir lesendum hinar ýmsu jógastöður. Annan til fjórða febrúar verður hún með viðburðinn Heil helgi á Hótel Kviku.

Hættan að tankurinn klárist í febrúar

„Hugmyndin er skemmtileg helgi þar sem ég leiðbeini konum í átt að bættri heilsu og deili því sem ég hef lært á minni vegferð. Núna í byrjun árs eru margir eflaust búnir að strengja áramótaheit og ætla heldur betur að bæta sig.

Þá er hættan að fólk fari of geyst af stað, ætla að sigra heiminn strax í janúar og er svo búið með tankinn í febrúar og fara þá aftur í sama farið.“

Hún segist halda að öll þurfum við að staldra við og vera meira meðvituð um okkur sjálf.

„Við munum skoða hvernig við erum að eyða orkunni okkar. Við förum yfir hreyfingu, sjálfsstjórn og svo hluti eins og hvaða fólk við erum að umgangast og hvaða áhrif hafa þau samskipti á okkur.

Þetta þarf allt að haldast í hendur. Markmið nást ekki með því einfaldlega að setja þau heldur þarf að marka sér skýra stefnu og skref til þess að ná þeim. Annars eru þetta bara draumórar sem verða aldrei að veruleika.

Þetta er allt spurning um jafnvægi. Að vita hvenær maður á að gefa í og hvenær á að slaka á, að kunna að hlusta á líkamann og fylgja hjartanu. Læra að setja sér raunhæf markmið og fylgja þeim eftir. Að gera eitthvað á hverjum degi sem hjálpar þér að komast þangað sem þú vilt.“

Jóga verður undirstaða viðburðarins Heil helgi.Aðsend

Íslensk náttúra, hreyfing og öndunaræfingar

Hún segir að grunnundirstaða helgarinnar sé að sjálfsögðu jóga en einnig verði farið í hugleiðslu undir leiðbeiningu.

„Íslensk náttúra verður í fyrirrúmi ásamt hreyfingu og öndunaræfingum. Í lok dags verður svo farið í heita pottar og gufu.“

Þóra segir að það sé hollt að skrifa ákveðin markmið niður á hverjum degi sem hjálpa fólki við að ná sínum draumi.

„Við lærum ýmis tól og tæki sem við getum gert hvar sem er og hvenær sem er. Það er takmarkað pláss í boði því ég vil að upplifunin sé einstök en skráningu lýkur 19 janúar.“

Þóra er með síðuna 101yoga.is og þá er hún einnig virk á Instagram @101yogareykjavik.

Jógastaða vikunnar Heilsa Jóga