Vill breyta lögum um að­gerðir gegn peninga­þvætti

„Ég fer í lúgu til að taka út peninga og ætla ekki að taka út nema 200 evrur. Ég svara samviskusamlega nokkrum spurningum, þar á meðal við hvað ég starfa. Um leið og ég segist vera stjórnmálamaður sé ég að viðvörunarljósin fara í gang í augunum á konunni, sem er að afgreiða mig,“ segir Hanna Katrín Friðriksson, þingflokksformaður Viðreisnar í Bítinu á Bylgjunni í morgun, um uppákomu sem hún lenti í á flugvelli í Stokkhólmi fyrir nokkrum árum. 

Hún segir konuna hafa rætt heillengi við kollega sinn og hún ekki áttað sig á hvað gekk á fyrr en þau komu fram. 

„Þau halda áfram að tala saman og ég heyri hann segja við hana: Þessi upphæð er undir mörkunum þannig að þú afgreiðir þetta bara en þá fer þetta inn í kerfið þannig að ef hún fer að taka út fleiri peninga þá verður það stoppað,“ segir Hanna Katrín. Hún segir þetta hafa verið eitt dæma um hve mikið vesen hefur skapast vegna aðgerða gegn peningaþvætti og hve langt það gengur víða. 

Skilur að fjölskyldan rati á listann

Fjallað hefur verið mikið um aðgerðir gegn peningaþvætti og fjármögnun þeirra í Bítinu í vikunni en síðan lög um þær voru samþykkt hefur fjöldi manna kvartað undan því hversu langt þau ganga. 

Hanna nefnir þar að dætur hennar báðar, sem eru námsmenn en fullorðnar, hafi sama sumar lent í miklu veseni með bankann sinn. Hann hafi kallað eftir skattskýrslum langt aftur í tímann og þær þurft að standa í stappi til að fá sumarhýruna sína millifærða á erlenda reikninga, þar sem þær stunduðu nám. 

„Eitt er að stjórnmálamenn undirgangist svona skilyrði, við höfum í ákveðnum tilfellum ákveðin færi á að haga okkur illa ef svo má segja. Ráðandi fólk gerir það og það er ekki bara þegar þessi lög eru sett hér, ná ekki bara yfir stjórnmálafólk heldur alls konar fólk í ráðandi stöðum. Svo útvíkkast hann og nær yfir fjölskyldumeðlimi. Eins íþyngjandi og það er þá er líka alveg hægt að hafa skilning á því nema kannski að það hvað okkur hættir stundum að ganga of langt,“ segir Hanna. 

Sagði sig úr stjórn hljómsveitarinnar vegna vesens

Hún nefnir sem dæmi að Ragnhildur Sverrisdóttir, konan hennar, hafi þurft að segja sig úr stjórn hljómsveitarinnar Úkúlellurnar vegna vandræða í tengslum við peningaþvættislögin. Hljómsveitin hafi ætlað að halda tónleika og leigja posa til að taka við greiðslum. Vegna stjórnmálalegra tengsla Ragnhildar hafi vesenið við posaleiguna verið svo mikið að þær hafi að endingu gefist upp á að hafa posa á tónleikunum. Ragnhildur hafi þess vegna sagt sig úr stjórn hljómsveitarinnar til að koma í veg fyrir fleiri svona atvik.

„Ég hef sjálf setið í fleiri ár í stjórn sjálfseignarfélags sem heitir Hlíðarendi og tengist Val, félaginu mínu þar sem ég lék handbolta í fleiri, fleiri ár. Þar gerðist það sama, þegar fyrirtæki hér heima, Keldan og Creditinfo, fóru að safna upplýsingum um stjórnmálaleg tengsl til að  búa til gagnagrunn fyrir tilkynningaskylda aðila til að vísa í þá fá þessir félagar mínir í þessu almannaheillafélagi, sjálfboðaliðar, skilaboð um að þeir teljist einstaklingar með stjórnmálaleg tengsl vegna veru minnar í þessari stjórn,“ segir Hanna. 

Ástæða þess að stjórnarmennirnir rötuðu á þennan lista er að markmið laganna er að raunverulegir eigendur fyrirtækja og félaga séu skráðir. Í stjórnum sjálfseignarfélaga, þar sem eru engir raunverulegir eigendur, teljast stjórnarmenn hins vegar til raunverulegra eigenda samkvæmt lögunum. Hanna segist vegna þessa hafa neyðst til að segja sig úr stjórn félaga sinna vegna.

„Ég sagði mig úr stjórn Hlíðarenda í haust og ætlaði svo að gera eitthvað í þessu með það að skoða hvort ekki væri hægt að skoða breytingar á þessum lögum. Þannig að þetta skilyrði um hverjir teljist raunverulegir eigendur og gangast þar með undir þessa ofboðslegu skoðun og höft.“

Hlusta má á viðtalið við Hönnu Katrínu í heild sinni í spilaranum hér að neðan.