Halla lítur í kringum sig

Hjá Höllu hefur verið rekinn í Grindavík frá árinu 2016 og áherslan lögð á heimilislegan og hollan mat. Um leið hefur verið reynt að svara kalli viðskiptavinarins. Halla fór í útrás árið 2018 og opnaði Hjá Höllu á Keflavíkurflugvelli sem notið hefur mikilla vinsælda.

Halla segir í færslu á Facebook að hún hafi fulla trú á að Grindvíkingar muni eiga þann kost að snúa aftur heim einn daginn. En á meðan óvissan sé svo mikil þurfi þau aðstöðu til að halda áfram með reksturinn.

„Ég er svo sammála, það þarf að vera raunsær þó það sé ekki auðvelt. Ég er búin að gefa allt svigrúm sem ég tel vera hægt að gefa frá minni hálfu til þess að bíða eftir góðum svörum en ég held að við verðum að bíða áfram.

Óvissan hefur verið mikil hjá Grindvíkingum undanfarin ár. Rætt var við Höllu í Íslandi í dag árið 2021 þegar gaus í Fagradalsfjalli.

Ég trúi því að framtíðin sé björt fyrir Grindavík en hvenær sú framtíð byrjar er óljóst. Á meðan er ég ekki tilbúin að sleppa tökum og ætla að halda áfram og vera tilbúin að fara til baka þegar tími gefst og er réttur fyrir hvern og einn,“ segir Halla.

„Það er líka mikilvægt að allir skilji og taki tillit til ákvarðana sem hver og einn tekur fyrir sig og sína. Það er búið að sanna það fyrir löngu að ef þú hugsar ekki um sjálfan þig þá gerir það enginn fyrir þig.“

Halla segist í leit að vinnslueldhúsi með góðu borðplássi og góðu kæli- og frystiplássi. Þau horfi bæði til Reykjanesbæjar, þar sem þau hafa fengið inni hjá Axel og félögum í Skólamat undanfarnar vikur, og höfuðborgarsvæðisins.

„Endilega ef þið hafið eitthvað fyrir okkur eða þekkið einhvern sem á eitthvað fyrir okkur þá erum við til í að skoða það.“