Gjóskan út á haf og ætti því ekki að trufla flug

Þetta segir Sigríður Magnea Óskarsdóttir, vakthafandi náttúruvásérfræðingur á Veðurstofunni, í samtali við fréttastofu. Eins og fram hefur komið leggur svartan gosmenn í bland við vatnsgufu upp af eldgosinu og eru þar mögulega fyrstu merki um svokallað leirgos.

„Staðan núna er þannig að það virðist vera sem gosvirknin hafi dregist aðeins saman, í svona þrjú til fjögur gosop frá því sem var fyrir hádegi,“ segir Sigríður. Hún segir jarðskjálftavirkni áfram mjög litla.

„Við sáum svo mikinn reyk myndast og við teljum við fyrstu athugun líklegast að um grunnvatn sé að ræða, það sé þá samspil kviku og vatns. Það gæti fylgt því eitthvað smá gjóskufall.“

Gæti það haft áhrif á flug?

„Ekki eins og staðan er núna. Vindáttin er þannig að gjóskan blæs út á haf, þannig að það ætti ekki að hafa áhrif á flug að svo stöddu.“

Sigríður segir atburðarásina mjög svipaða því sem var í síðustu gosum á Reykjanesskaga. Þá hafi dregið hratt úr virkninni, þó nú virðist hafa dregist aðeins hægar úr henni en áður.

Geturðu spáð í framhaldið út frá því?

„Það er alltaf erfitt að gera það en við teljum að líklegast sé að gosið haldi áfram í einn tvo daga, en það gæti varað eitthvað lengur, það er ekki hægt að útiloka það.“