Hvetja til aukinnar hernaðar­upp­byggingar Evrópu

Donald Tusk nýr forsætisráðherra Póllands heimsótti Olaf Scholz kanslara Þýskalands í gær. Báðir hvetja þeir til þess að herða á hergagnaframleiðslu ríkja Evrópusambandsins og aukins samstarfs þeirra í varnarmálum.

 Leiðtogarnir brugðust báðir hart við yfirlýsingum Donalds Trumps fyrrverandi forseta Bandaríkjanna um helgina, þar sem hann sagðist hvetja Rússa til að ráðast á öll ríki Evrópu sem ekki hefðu sett að minnsta kosti tvö prósent þjóðarframleiðslu sinnar til varnarmála og Bandaríkin myndu ekki verja þau mætti hann ráða.

„Loforð NATO um vernd eru ótakmörkuð: Allir fyrir einn og einn fyrir alla. Ég vil taka skýrt fram af eftirfarandi ástæðum: öll skrumskæling stuðnings- ábyrgðar NATO er fyrirhyggjulaus og hættuleg og er í þágu Rússa einna. Enginn getur leikið sér að eða „samið“ um öryggi Evrópu," sagði Scholz.

Forsætisráðherra Póllands sagði Pólverja vilja efla loftvarnir sínar til mikilla muna á næstu mánuðum og stórauka þyrfti framleiðslu á skotfærum í Evrópu. Ekki einungis til aðstoðar Úkraínu heldur til að auka varnarmátt Evrópu.

„Þessi orð Donalds Trump, fyrrverandi forseta Bandaríkjanna, ættu að virka sem blaut tuska í andlit allra þeirra sem hundsa sífellt þessa stöðugu ógn sem Evrópa stendur frammi fyrir. Við þurfum auðvitað að standa á eigin fótum og treysta enn á fullt samstarf við Bandaríkin. En Evrópa verður að gera meira til að tryggja öryggi sitt," sagði Tusk.

Öldungadeild Bandaríkjaþings samþykkir aðstoð

Bandaríska öldungadeildin samþykkti loksins í gærkvöldi frumvarp um hernaðaraðstoð við Úkraínu, Ísrael og Taivan upp á 95 milljarða dollara, þar af 60 milljarða til Úkraínu.Fámennur hópur Republikana kom lengi vel í veg fyrir atkvæðagreiðslu um frumvarpið sem var að lokum samþykkt með atkvæðum Demókrata og tólf öldungardeildarþingmanna Republikana.

„Það eru vissulega mörg ár, kannski áratugir síðan öldungadeildin samþykkti frumvarp sem hefur svo mikil áhrif, ekki bara á þjóðaröryggi okkar, ekki bara öryggi bandamanna okkar heldur einnig á öryggi vestrænna lýðræðisríkja," sagði Schumer.

Volodymyr Zelensky forseti Úkraínu fagnaði niðurstöðu atkvæðagreiðslunnar í daglegu kvöldávarpi sínu til úkraínsku þjóðarinnar í gærkvöldi:

„Ég þakkað Chuck Schumer forseta öldungadeildarinnar og Mitch McConnell leiðtoga Republikana í deildinni fyrir þrautseigju þeirra og siðferðislega afstöðu. Lýðræðið mun örugglega hafa sigur. Ég þakka öllum þeim 70 öldungardeildarþingmönnum sem tryggðu framgang málsins. Þetta var fyrsta skrefið, næsta skref er að koma málinu í gegnum fulltrúadeildina. Við reiknum með jákvæðri niðurstöðu,“ sagði Zelensky.